وائٹ ہاؤس کے سامنے جوتا بردار مظاہرہ

صدر بش ان دنوں وائٹ ہاؤس سے رخصت ہونے کی تیاریوں میں مصروف ہیں اور الوداعی دورے اور ملاقاتیں کررہے ہیں۔ عراق کے دورے کے موقع پر ایک صحافی کی جانب سے ان پر جوتا پھینکے جانے کے واقعہ کو نہ صرف عالمی میڈیا میں نمایاں جگہ ملی بلکہ دنیا کے کئی ملکوں میں عراقی صحافی منتظر الزیدی سے یک جہتی کے اظہار میں مظاہرے بھی ہوئے۔ جوتوں کے ساتھ ایک ایسا مظاہرہ جمعرات کے روز وائٹ ہاؤس کے سامنے بھی ہوا جس میں جنگ مخالف افراد نے شرکت کی۔

اس مظاہرے کی کوریج کے لیے بڑی تعداد میں میڈیا کی ٹیمیں موجود تھیں۔ مظاہرین نے بہت سے جوتے اکٹھے کررکھے تھے اور ہر جوتے کے ساتھ عراق جنگ میں ہلاک ہونے والے امریکی کے نام کی چٹ لگی تھی اور مظاہرین کا کہنا ہے کہ جوتا اس کی جانب ہے جو اس جنگ میں اپنی جان سے ہاتھ دھو بیٹھا۔

مظاہرین کا کہنا تھا کہ جنگ کے نتیجے میں امریکی عوام کو بہت نقصان ہوا ہے اور ہزاروں والدین کو اپنے بچے اس جنگ کی بھٹی میں جھونکنے پڑے ہیں۔ ان کا کہناتھا کہ جنگ مسئلے کا حل نہیں ہے اور امریکی عوام جنگ نہیں چاہتے۔