محمود علی درانی

وزیراعظم یوسف رضا گیلانی کی طرف سے قومی سلامتی کے مشیر محمود علی درانی کو برطرف کیے جانے کے بعد ان کی جگہ نئی تقرری کے لیے صلاح و مشوروں کا سلسلہ جاری ہے لیکن اس کے ساتھ ساتھ اپوزیشن جماعتوں اور سیاسی مبصرین حکمران پیپلز پارٹی پر یہ تنقید بھی کررہے ہیں کہ اس نے ممبئی حملوں کے بعد سے جو فیصلے اور اقدامات کیے وہ ملک کے اہم اداروں کے درمیان ربط کے فقدان کوظاہر کرتے ہیں جس کی وجہ سے پاکستان کو بین الاقوامی برادری میں شرمندگی اٹھانا پڑی ہے۔

ناقدین کا کہنا ہے کہ اجمل قصاب کے پاکستانی شہری ہونے کے معاملے، بھارتی طیاروں کی طرف سے پاکستان کی فضائی حدود کی خلاف ورزی اور آئی ایس آئی کے سربراہ کو بھارت بھیجنے کا فیصلہ وہ معاملات ہیں جنہوں نے حکومتی سطح پر موجود بے ربطگی کو عیاں کیا ہے ۔

سابق سیکریٹری خارجہ شمشاد احمدخان

وائس آف امریکہ سے انٹرویومیں سابق سیکریٹری خارجہ شمشاد احمدخان نے کہا کہ وفاقی حکومت نے ممبئی حملوں کے بعد سے بھارت کے ساتھ سفارتی محاذ پر جس طریقہ کار کا مظاہرہ کیا اس سے نہ صرف حکومت کی اپنی کمزوری ظاہر ہوتی ہے بلکہ یہ بھی ظاہر ہوتا ہے کہ دفتر خارجہ کو پابندیوں اور دباؤ کا سامنا ہے۔

واضح رہے کہ بدھ کے روز مقامی ذرائع ابلاغ میں ممبئی حملوں کے مبینہ دہشت گرد اجمل قصاب کے پاکستانی شہری ہونے کی خبروں کے بعد جہاں حکومتی نمائندوں کے بیانات میں تضاد سامنے آیا وہیں دفتر خارجہ کو بھی اس کا خمیازہ بھگتنا پڑا جو کہ ریاست کی خارجہ پالیسی کا خالق اور ترجمان ہوتا ہے۔ ایک طرف دفتر خارجہ کے ترجمان نے اس خبر کی تصدیق کردی جبکہ سیکریٹری خارجہ کا کہنا تھا کہ اجمل قصاب کے پاکستانی شہری ہونے کے حوالے سے کچھ کہنا قبل از وقت ہے۔

شمشاد احمد خان نے کہا کہ اس کی وجہ یہ ہے وفاقی حکومت نے دفتر خارجہ کو کوئی واضح ہدایات جاری نہیں کی ہیں جس کے باعث ملک کی سفارتی سرگرمیوں میں ابہام کا پہلو نمایاں ہے۔ انہوں نے کہا کہ اس بات سے قطع نظر کہ اجمل قصاب پاکستان کا شہری ہے یا نہیں پاکستان کی حکومت کو اپنے ہر اس شہری کے خلاف کارروائی کرنی چاہیے جو کسی بھی دہشت گردی میں ملوث ہو۔ تاہم ان کا یہ بھی کہنا تھا کہ غیر ریاستی عناصر کے خلاف کارروائی کرنا صرف پاکستان ہی نہیں بلکہ بھارت کی بھی ذمہ داری ہے۔

واضح رہے کہ وزیراعظم یوسف رضاگیلانی نے قومی سلامتی کے مشیر محمود علی درانی کو اس بنا پر برطرف کیا کہ انہوں نے اجمل قصاب کے پاکستانی شہری ہونے کے حوالے سے بیان انہیں اعتماد میں لیے بغیر جاری کیا جبکہ درانی نے اپنے ایک انٹرویو میں کہا کہ اجمل قصاب کے پاکستانی شہری ہونے کی بات منظر عام پر لانے کا فیصلہ ایک دن پہلے ہوچکا تھا اور حکومت اور خفیہ اداروں نے خود انہیں اس حوالے سے مطلع کیا تھا ۔ محمود علی درانی نے کہا کہ وزیراعظم لاہور میں تھے اور اجمل قصاب کے معاملے سے بے خبر تھے۔