ការិយាល័យ
- បកប្រែ:
- English
ការិយាល័យអនុព័ន្ធផ្នែកច្បាប់
ការិយាល័យអនុព័ន្ធផ្នែកច្បាប់នៅទីក្រុងភ្នំពេញគឺជាវត្ដមានទី៦០ នៅបរទេសរបស់ការិយាល័យស្រាវជ្រាវសហព័ន្ធ (FBI) ដែលជាផ្នែកមួយនៃក្រសួងយុត្ដិធម៌របស់សហរដ្ឋអាមេរិក ។ ការិយាល័យផ្នែកច្បាប់មានបុគ្គលិកជំនាញផ្នែកអនុវត្ដច្បាប់និងបុគ្គលិកជំនួយរបស់ FBI ធ្វើការដើម្បីរារាំងបទឧក្រិដ្ឋនៅបរទេសឆ្ងាយៗពីសហរដ្ឋអាមេរិកនិងដើម្បីជួយដោះស្រាយបញ្ហាបទឧក្រិដ្ឋជាអន្ដរជាតិអោយបានឆាប់បំផុត ។
សមដូចដែលលោកនាយក FBI គឺលោក Robert S. Mueller III បានធ្វើការកត់សំគាល់មកថា “សាកលភាវូបនីយកម្ម មិនថាភេរវកម្ម ការជួញដូរជាអន្ដរជាតិនូវគ្រឿងញៀន របស់រត់គយ និងការជួញដូរមនុស្ស ឬបទឧក្រិដ្ឋតាមប្រព័ន្ធអ៊ិនធ័រណែតទេ សុទ្ធតែទាមទារអោយយើងធ្វើការប្រឹងប្រែងរួមគ្នា នៅជុំវិញពិភពលោក ។ ការនេះមានន័យថាយើងត្រូវមានភ្នាក់ងាររបស់យើងធ្វើការដោយផ្ទាល់ជាមួយសមភាគីរបស់យើងនៅបរទេសលើករណីដែលជាប្រយោជន៍ទៅវិញទៅមក មិនមែនគ្រាន់តែដើម្បីដោះស្រាយបញ្ហាបទឧក្រិដ្ឋដែលត្រូវបានប្រព្រឹត្ដតែប៉ុណ្ណោះទេ តែដើម្បីការពារកុំអោយកើតមានផងដែរនូវបទឧក្រិដ្ឋនិង អំពើភេរវកម្ម ដោយធ្វើការចែករំលែកពត៌មានអោយបានទាន់ពេលវេលា“ ។
សកម្មភាពនៃការិយាល័យច្បាប់នេះគឺដើម្បី ៖
- សំរបសំរួលការស៊ើបអង្កេតជាអន្ដរជាតិជាមួយសហការីរបស់គេ ។
- រកមើលមុខសញ្ញាអន្ដរជាតិសំរាប់បំរើការស៊ើបអង្កេតក្នុងសហរដ្ឋអាមេរិក ។
- ភ្ជាប់គ្នារវាងលទ្ធភាពរបស់សហរដ្ឋអាមេរិកនិងលទ្ធភាពរបស់អន្ដរជាតិក្នុងផ្នែកភេរវកម្មនិងឧក្រិដ្ឋកម្មសំខាន់ៗដើម្បីធានាសុវត្ថិភាពដល់សាធារណៈជនអាមេរិកនៅទីនេះ និងនៅបរទេស ។ បទដ្ឋានសំរាប់ធ្វើសកម្មភាពរួមគ្នានិងការចែករំលែកពត៌មានគ្នាមានចែងជាទូទៅក្នុងកិច្ចព្រមព្រៀងជាផ្លូវការរវាងសហរដ្ឋអាមេរិកនិងប្រទេសជាម្ចាស់ផ្ទះ ។
- សំរបសំរួលវគ្គបណ្ដុះបណ្ដាលរបស់ FBI ចំពោះនគរបាលនៅតាមតំបន់ ដែលមានរាប់ពីការប្រឆាំងភេរវកម្មនិងបទឧក្រិដ្ឋតាមប្រព័ន្ធអ៊ិនធ័រណែត រហូតដល់បច្ចេកទេសធ្វើកោសលវិច័យ ការជួញដូរមនុស្សនិងសិទ្ធិមនុស្ស ។
កម្មវិធីអនុព័ន្ធផ្នែកច្បាប់របស់ FBI ស្ថិតក្រោមការគ្រប់គ្រងរបស់ការិយាល័យប្រតិបត្ដិការអន្ដរជាតិ ដែលដឹកនាំដោយភ្នាក់ងារពិសេសម្នាក់ ប្រចាំនៅទីស្នាក់កាធំរបស់ FBI ក្នុងទីក្រុងវ៉ាស៊ីនតោន ។ ការិយាល័យនេះធ្វើការទាក់ទងយ៉ាងជិតស្និទ្ធជាមួយទីភ្នាក់ងារដទៃទៀតរបស់សហព័ន្ធប៉ូលិសអន្ដរជាតិ ប៉ូលិសបរទេស និងមន្ដ្រីសន្ដិសុខនៅទីក្រុងវ៉ាស៊ីនតោន ហើយនិងសមាគមជាតិនិងអន្ដរជាតិផ្នែកអនុវត្ដច្បាប់ ។
បើចង់ដឹងបន្ថែមពីសកម្មភាពទាក់ទងនឹងការិយាល័យផ្នែកច្បាប់របស់ FBIសូមបើកគេហទំព័រស្ដីពីសន្ទស្សន៍រឿងជាអន្ដរជាតិរបស់ FBI (FBI Index of international stories) ។