Sharmila Tagore

بالی وڈ کی مشہور ہیروئن شرمیلا ٹیگور کو اِس سال 62 ویں بین ا لاقوامی کانز فلم فیسٹیول کےجیوری ممبران کی نو رکنی ٹیم میں شامل  کیا گیا ہے۔  گزرے زمانے کی منجھی ہوئی خوب صورت اداکارہ شرمیلا ٹیگور فی الحال سینٹرل بورڈ آف فلم سرٹیفی کیشن کی سربراہ ہیں۔  عالمی سطح کا سب سے بڑا فلمی میلہ پیرس کے شہر کانز میں اِس سال 13 سے 24 مئی کے درمیان منعقد ہوگا۔

اگرچہ 2002ء کے بعد سے بالی وڈ کی کوئی بھی فلم کانز فلمی میلے میں نامزدگی حاصل کرنے میں ناکام رہی ہے،  تاہم اِس عالمی میلے میں جیوری کی حیثیت سے بھارتی فلمی صنعت کے نمائندوں کی موجودگی اس بات کا ثبوت ہے کہ بین الاقوامی فلمی دنیا چاہے دیر سے ہی سہی، مگر ہندی فلم انڈسٹری کی اہمیت کو سمجھنے لگی ہے۔

شرمیلا نے 1959ء میں بھارتی فلمی تاریخ کے عظیم فلم ساز ستیہ جیت رے کی فلم اپور سنسار میں بطور چائلڈ آرٹسٹ اپنےفلمی کیریئر کا آغاز کیا تھا۔  کشمیر کی کلی، آرادھنا، داغ، سفر، این ایونگ ان پیرس، امرپریم اور موسم جیسی سپرہٹ فلمیں میں کام کرنے والی 52 سالہ شرمیلا کا انٹرنیشنل فلم فیسٹیول کی جیوری ممبران میں شامل ہونا بالی وڈ کے لیے بھی انتہائی فخر کی بات ہے۔

دل چسپ بات یہ ہے کہ شرمیلا سے پہلے کانز فلمی میلے میں  بالی وڈ سے اب تک صرف دو ہیروئنوں کو ہی جیوری ممبر کے فرائض انجام دینے کے لیے مدعو کیا گیا ہے۔  سابق ملکہ حسن ایشوریا رائے 2003ء میں کانز کی جیوری کا حصہ تھیں لیکن وہ 2002ء سے تقریبا ہر سال کانز کے اِس فلمی میلے میں شرکت کے لیے پہنچ ہی جاتی ہیں۔

اِس کے علاوہ فراق جیسی بہترین فلم بناکر فلم سازی کے شعبے میں پہلا قدم رکھنے والی اداکارہ نندیتا داس بھی 2005ء میں کانز فلمی میلے کی جیوری ممبران میں شامل تھیں۔  خیال رہے کہ  بکر پرائز جیتنے والی نامور مصنفہ اور سماجی کارکن اروندھتی رائے تیسری بھارتی خاتون ہیں جنھیں ماضی میں کانز میلے میں جیوری کی حیثیت سے مدعو کیا گیا تھا۔

رابندر ناتھ ٹیگور کی پوتی اور عظیم کرکٹ کھلاڑی  نواب منصور علی پٹودی کی اہلیہ شرمیلا 62 ویں کانز فلمی میلے میں فرانسیسی اداکارہ ازابیلے ہوپرٹ کی سربراہی میں اٹلی کی ایشیا ارجینٹو، ترکی کی نوری بلگے سیلن، برطانیہ کے حنیف قریشی، امریکہ کے جیمس گرے  جیسے جیوری ممبران  کے ساتھ کام کریں گی۔

شرمیلا ٹیگور کے دو بچے سیف علی خان اور سوہا علی بھی بالی وڈ کا حصہ ہیں۔  فلم اوم کارا اور ریس میں بہترین اداکاری کے بعد سے سیف کا شمار بھی بالی وڈ کے چوٹی کے ستاروں میں کیا جاتا ہے۔