 |
|
معروف اسکالر اور پاکستان اور بھارت کے بارے میں کئی کتابوں کے مصنف اسٹیفن کوہن نے کہا ہے کہ ممبئی حملوں کے ذمہ دار یقیناً یہ چاہتے ہیں کہ پاکستان اور بھارت کے درمیان کشیدگی بڑھے۔ لیکن ان کا کہنا ہے کہ ان دو ایٹمی طاقتوں کے درمیان معمولی سی جھڑپ بھی عالمی امن کے لیے خطرناک ہوسکتی ہے اور امریکہ کی کوشش ہے کہ دونوں ممالک صلح جوئی کا راستہ اختیار کریں۔وائس آف امریکہ نے ان سے پاک بھارت تعلقات کے حوالے سے ایک انٹرویو کیا۔
ممبئی پر حملہ کرنے والوں کے بارے میں ان کا کہنا تھا کہ سب سے پہلے تو شک القاعدہ پر کیا گیا لیکن جیسے جیسے ثبوت سامنے آئے تو یہ معلوم ہوا کہ ممبئی حملوں میں ملوث لوگ پاکستان سے بھارت گئے تھے اسکا یہ مطلب ہرگز نہیں ہے کہ اس کارروائی کا ذمہ دار پاکستان کی حکومت کو ٹھرایا جائے لیکن یہ ضرور تھا کہ ان لوگوں کے پاکستان سے تعلق کی وجہ سے پاکستان کا نام لیا جانے لگا۔
جب ان سے پوچھا گیا کہ بھارتی حکومت نے پاکستان کی جانب سے حملہ آوروں کو نان اسٹیٹ ایکٹرز قرار دیئے جانے کے موقف کو مسترد کردیا تھا۔ اس سلسلے میں واشنگٹن پاکستان کے موقف سے متفق ہے یا بھارت کےموقف سے تو کوہن نے کہا۔
اس سلسلے میں دو سوال پیدا ہوتے ہیں، ایک تو یہ کہ امریکہ کو اس حملے میں شامل لوگوں کے بارے میں کیا معلومات ہیں اور دوسرا یہ کہ امریکہ کس حد پاکستا ن کو ذمہ دار سمجھتا ہے۔ لگتا یہ ہے کہ امریکہ کو یہ اندازہ ہے کہ حملہ آوروں کا تعلق پاکستان سے تھا اور وہ پاکستان سے ہی آئے تھے۔ یہ تو ہوئی تعلق کی بات۔ جہاں تک ذمہ داری کی بات ہے تو میں یہ کہنا چاہوں گا کہ کوئی بھی ایسا ملک جو اپنے آپ کو ایک خود مختار ملک سمجھتا ہو اسکی یہ ذمہ داری ہوتی ہے کہ اس کی سرزمین کسی دوسرے ملک پر حملوں کےلیے استعمال نہ ہونے دے۔ اور اقوام متحدہ کا ایک رکن ہونے کی حیثیت سے پاکستان اس قانون کا احترام کرتا ہے۔ لیکن ہم یہ دیکھتے ہیں کہ کئی برسوں سے بعض عناصر دوسرے ممالک پر حملوں کے لیے پاکستان کی سرزمین کا استعمال کررہے ہیں چاہے وہ طالبان ہوں یا پھر لشکرِ طیبہ کے لوگ۔ ظاہر ہے میں یہ نہیں کہہ رہا ہوں کہ پاکستان نے دانستہ طور پر ان عناصر کو دیگر ممالک میں حملے کرنے کے لیے چھوٹ دی لیکن یہ میں ضرور کہنا چاہوں کہ انھیں روکنے میں یا تو پاکستان نے کوشش نہیں کہ یہ پھر کوشش کی تو ناکام رہا ہے۔
جب اسٹیفن کوہن سے پوچھا گیا کہ آپ نے دہشت گردوں کو روکنے میں ناکامی کے ساتھ ساتھ نہ کوشش نہ کرنے کی بھی بات کی۔ یہ بتایئے کہ ایک ایسے ملک کے بارے میں یہ بات کیسے کہی جاسکتی ہے جو خود اتنی بری طرح دہشت گردی کا نشانہ بن رہا ہو۔ جہاں ملک کے صدر حملے ہو چکے ہوں اور ایک سابق وزیرِ اعظم کو دہشت گردوں نے نشانہ بنا دیا ہو اور جسکے اپنے شہری اس قسم کی کارروائیوں میں ہلاک ہورہے ہوں تو ان کا جواب تھا ۔
اس سلسلے میں آپ کو مختلف واقعات کو الگ الگ کرکے دیکھنا ہوگا۔ جہاں تک سابق صدر پرویز مشرف پر قاتلانہ حملوں، سابق وزیرِ اعظم بے نظیر بھٹو کی ہلاکت اور میریٹ ہوٹل میں بم دھماکے جیسے واقعات ہیں تو میں یقینی طور پر یہ سمجھتا ہوں کہ انھیں روکنے کی کوشش ضرور کی گئی ہوگی لیکن ان میں ناکامی رہی۔ لیکن ممبئی میں ہونے والے حملوں کے بعد جو شواہد سامنے آئے ہیں ان سے یہ معلوم ہوتا ہے کہ حملہ آورں میں سے کچھ نے پاکستان میں تربیت بھی حاصل کی تھی اور میرے خیال سے یہ ممکن نہیں ہے کہ پاکستان کی اینٹلی جنس ایجنسیوں کو اس بات کا علم نہ ہو کہ ان کے ملک میں ایسے عناصر تربیت حاصل کررہے ہیں۔ میں یہ ہرگز نہیں کہہ رہا کہ ان ایجنسیوں نے ان کی مدد کی لیکن میرے خیال سے ان لوگوں کو روکنے کی موثر کوشش نہیں کی گئی۔پاکستان میں لوگوں کی ایک بہت بڑی تعداد مسلح کارروایئوں میں ملوث گروپس کی مخالف ہے لیکن یہ بات بھی درست ہے کہ کچھ حلقے ان گروپس کو نہ صرف حق بجانب سمجھتے ہیں بلکہ ان کی مدد بھی کرتے ہیں۔ میں یہاں یہ کہنا چاہوں گا کہ اس معاملے میں پاکستان اکیلا نہیں ہے۔ بلکہ کسی نہ کسی موقع پر بھارت اور امریکہ بھی دیگر ممالک میں دہشت گردی کی کارروائیوں کے لیے دہشت گرد گروپس کی مدد کرتے رہے ہیں۔
وائس آف امریکہ نے کوہن سے پوچھا کہ پاکستان اور بھار ت کے درمیان کشیدگی کو کم کرنے کے لیے امریکہ یقیناً کوشش کرتا ہے ۔ یہ بتائیے کہ امریکہ کی کوششیں کیا دہشت گردی کے روکنے کے لیے معاون ثابت ہوتی ہیں یا امریکہ اور بھارت مخالف گروپس میں اس احساس کے باعث کے امریکہ کا جھکاو بھارت کی جانب زیادہ ہے وہ ان دونوں ممالک کو نیچا دکھانے کے لیے اپنی کارروائیوں میں زیادہ پرعزم ہوجاتے ہیں۔
ان کا جواب تھا کہ کارگل کے واقعے کے بعد پاکستان چاہتا تھا کہ امریکہ پاک بھارت کشیدگی کو کم کرنے کے لیے اپنا کردار ادا کرے جبکہ سنہ2002 جو صورتحال پیدا ہوئی اس میں بھارت کی یہ خواہش تھی کہ امریکہ پاکستان پر دباو ڈالے۔ تو اس طرح دنوں ممالک کی خواہش پر امریکہ دونوں ممالک کی مشاورت کرتا رہا ہے۔ کارگل کے معاملے میں امریکہ پاکستان کو جبکہ سنہ2002 میں ہونے والی کشیدگی کے لیے امریکہ بھارت کو قصوروار سمجھتا ہے۔ تو ہم وقت اور موقع کی مناسبت سے اپنا کردار ادا کرتےرہے ہیں لیکن میں نہیں سمجھتا کہ یہ صورتحال زیادہ دیرپا ہوسکتی ہے کیونکہ پاکستان، بھارت یا پھر خود امریکہ کی چھوٹی سی بھی غلطی سے ان دونوں ممالک کےدرمیان کشیدگی تشویشناک حد تک بڑھ سکتی ہے اور ممبئی حملوں میں ملوث گروپس یہی چاہتے ہیں کہ پاکستان اور بھارت کے درمیان کشیدگی بڑھے اوربلکہ وہ تو یہ بھی چاہتے ہیں کہ ان دونوں کے درمیان باقاعدہ جنگ ہو اور امن کے لیے امریکی کوششیں ناکام ہوں۔
ان سے ایک سوال یہ تھا کہ ممبئی میں ہونے والے حملوں کے بعد سے پاکستان نےمشتبہ گروپس اور افراد کے خلاف اب تک جو اقدامات کیے ہیں کیا انھیں نئی دہلی اور واشنگٹن میں کافی سمجھا جانا چاہیے یا اب بھی پاکستان سے ڈو مور کی بات میں کوئی وزن ہے۔
مسٹر کوہن نے کہا کہ میں بھارتی یا امریکی حکومت کی جانب سے تو کوئی بات نہیں کرسکتا لیکن یہ ضرور کہنا چاہوں گا کہ پاکستان نے اب تک جو اقدامات کیے اگر انھیں جاری رکھا جائے تو پھر بھارت کے پاس پاکستان کے خلاف انتقامی اقدامات کے لیے جواز باقی نہیں رہے گا۔ میں ایک بار پھر یہی کہوں گا کہ دہشت گرد چاہتے ہیں کہ بھارت پاکستان پر حملہ کرے اور دونوں ممالک کے درمیان جنگ شروع ہوجائےلیکن اس صورتحال سے نہ پاکستان کو فائدہ ہوگا نہ بھارت کو اور نہ عالمی برادری کو۔ اسی لیے امریکہ بھارت سے بار بار یہ کہہ رہا ہے کہ وہ اس پورے معاملے کو ٹھنڈے دماغ سے حل کرنے کی کوشش کرے۔
E-mail
پرنٹ کیجیئے
