وائٹ ہاؤس نے کہا ہے  کہ اُس نے  ملک کی  کار سازی کی صنعت کو ڈوبنے سے بچانے کے لیے کانگریس کے لیڈروں کے ساتھ  تعمیری مذاکرات کیے ہیں۔
لیکن ہفتے کے روز  پریس سیکریٹری ڈانا پیرینو نے ایک  بیان میں  کہا ہے کہ کوئى رقم اُس وقت تک حوالے نہیں کی جانی  چاہیئے، جب تک  اس بات کا اچھا امکان موجود نہ  ہو کہ ٹیکس گزاروں کو  اُن کی رقم واپس مل جائے گی۔

جمعے کو دیر گئے کانگریس کے سینئیر عہدے داروں نے کہا تھا کہ تین بڑی کار ساز کمپنیوں، جنرل موٹرز، فورڈ اور کرائسلر کو 15 ارب سے لیکر 17ارب ڈالر کے قرضے فراہم کرنے کے سمجھوتے پر غور کیا جارہا ہے۔

انہوں نے کہا ہے  کہ یہ رقم ، کم سے کم چند اور ماہ تک کمپنوں کو چلاتے رہنے کے لیے کافی ہوگی، اور یہ رقم  لاکھوں ڈالرکے اُس موجودہ پروگرام سے حاصل کی جائے گی ، جس کا مقصد کم ایندھن خرچ کرنے والی  موٹر گاڑیاں  تیار کرنے میں  کار ساز کمپنیوں کی مدد کرنا ہے۔

 عہدے داروں کا کہنا ہے کہ  اس منصوبے کی تفصیلات  کو ابھی  طے کیا جانا  باقی ہے اور اس میں  نگرانی کا اہم معاملہ بھی شامل ہے۔لیکن ارکانِ کانگریس کا کہنا ہے  کہ توقع ہے کہ وہ اگلے ہفتے  منصوبے پر ووٹنگ کریں گے۔