بان کی موون له‌ هه‌وڵه‌کانی بۆ گه‌یشتن به‌ ئاگربه‌ستێـک له‌ غه‌ززه‌ به‌رده‌وامه‌
له لایه‌‌ن VOA News 14/01/2009

سکرتێری گشـتی نه‌ته‌وه‌ یه‌کگرتووه‌کان بان کی موون داواکه‌ی بۆ ئاگربه‌سـتی ده‌م‌وده‌ست و درێژخایاند دووپات کرده‌وه‌ له‌ نێوان ئیسـرائیل و چه‌کداره‌کانی حه‌ماس له‌ که‌رتی غه‌ززه‌.

سکرتێری گشتی نه‌ته‌وه‌ یه‌کگرتووه‌کان له‌گه‌ڵ سه‌رۆکی میسری حوسنی موباره‌ک له‌ قاهیره‌ کۆده‌بێته‌وه‌، چوارشه‌ممه‌ 14 ی یه‌کی 2009

به‌ڕێز بان داواکه‌ی له‌ کۆنفرانسـێـکی هه‌واڵی ڕۆژی چوارشه‌ممه‌ له‌ قاهیره‌ دووباره‌ کرده‌وه‌، دوای گفتوگۆکانی له‌گه‌ڵ سه‌رۆکی میسـر حوسـنی موباره‌ک.

سه‌رۆکی نه‌ته‌وه‌ یه‌کگرتووه‌کان له‌ میسـره‌ له‌ سه‌ره‌تای سه‌ردانه‌که‌ی بۆ ڕۆژهه‌ڵاتی ناوه‌ڕاست که‌ ئامانجی کۆتایی‌هێنانی شه‌ڕه‌ له‌ غه‌ززه‌. میسر له‌ پـێشه‌نگی ئه‌وانه‌‌ بووه‌ که‌ هه‌وڵی گه‌یشتن به‌ ئاگربه‌سـتێـکی نێوان ئه‌و دوو لایه‌نه‌یان داوه‌.

هه‌روه‌ها به‌ڕێز بان گفتوگۆ له‌ هه‌ریه‌ک له‌ ئیسرائیل و که‌ناری ڕۆژئاوا و ئوردن و تورکیا و سوریا و لوبنان و کوه‌یت ده‌کات، به‌ڵام سه‌ردانی غه‌ززه‌ ناکات و له‌گه‌ڵ حه‌ماسیش کۆنابێته‌وه‌.

کاربه‌ده‌سـتانی حه‌ماس ڕۆژی سێشه‌ممه‌ له‌ قاهیره‌ ده‌سـتیان به‌ گفتوگۆکرد، هاوکات سه‌رچاوه‌ ئیسرائیلیـیه‌کان ده‌ڵێن کاربه‌ده‌سـتێـکی وه‌زاره‌تی به‌رگری ئیسرائیل به‌ ناوی ئامۆس گیلاد ڕۆژی پـێـنجشه‌ممه‌ له‌گه‌ڵ ناوبژیوانانی میسری کۆده‌بێته‌وه‌.

هه‌ردوولا داواکه‌ی ئه‌نجومه‌نی ئاسایشی نه‌ته‌وه‌ یه‌کگرتووه‌کانیان ڕه‌تکردۆته‌وه‌ که‌ داوای ئاگربه‌سـتێـکی ده‌م‌وده‌ست ده‌کات.