សេចក្តីប្រកាសពត៌មាន ក្នុងឆ្នាំ២០១២
- បកប្រែ:
- English
ស្ថានទូតសហរដ្ឋអាមេរិកបា្ររព្ធពិធីអបអរបុណ្យរ៉ាម៉ាដាន
នៅថ្ងៃព្រហស្បតិ៍ ទី២ ខែសីហា ឆ្នាំ២០១២ វេលាម៉ោង ៥:៤៥ ល្ងាច លោក William E. Todd ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា នឹងធ្វើជាម្ចាស់ផ្ទះរៀបចំពិធីអាហារស្រាយបួស (Iftar) សំរាប់សហគមន៍អ្នកកាន់សាសនាឥស្លាម នៅស្ថានទូតសហរដ្ឋអាមេរិកប្រចាំភ្នំពេញ។ ក្នុងការរៀបចំពិធីអាហារស្រាយបួស លោកឯកអគ្គរដ្ឋទូត William E. Todd នឹងដឹកនាំពិធីតាមប្រពៃណីបុណ្យរ៉ាម៉ាដានអ៊ីស្លាម ជាមួយឯកឧត្តម Zakaryya Adam សមាជិកសភា និងលោកស្រី Farah Pandith តំណាងពិសេសរបស់ក្រសួងការបរទេសសហរដ្ឋអាមេរិក សំរាប់សហគមន៍អ្នកកាន់សាសនា ឥស្លាម ដែលកំពុងធ្វើទស្សនកិច្ចនៅប្រទេសកម្ពុជា។
បុណ្យរ៉ាម៉ាដាន គឺជារយៈពេលមួយខែនៃការតមអាហារប្រចាំថ្ងៃទាំងស្រុង ចាប់ពីពេលថ្ងៃរះ ដល់ពេលថ្ងៃលិច សំរាប់អ្នកកាន់សាសនាឥស្លាមនៅជុំវិញពិភពលោក។ ក្នុងរដូវបុណ្យសាសនានេះ អ្នកកាន់សាសនាឥស្លាមតមមិនបរិភោគអាហារ ទឹកនិងបំពេញតំរូវការផ្សេងទៀតរបស់រាងកាយ ដើម្បីធ្វើអោយវិញ្ញាណរបស់គេមានភាពបរិសុទ្ធ ផ្តោតអារម្មណ៍យកចិត្តទុកដាក់ឡើងវិញលើជំនឿរបស់គេ និង ប្រតិបត្តិការលះបង់ចំពោះខ្លួនឯង។ Iftar គឺជាអាហារដែលគេបរិភោគនៅពេលល្ងាច ដើម្បីបញ្ចប់ ការតមអាហារនៃថ្ងៃនិមួយក្នុងរដូវបុណ្យរ៉ាម៉ាដាន។ តាំងពីឆ្នាំ២០០៣មក ស្ថានទូតសហរដ្ឋអាមេរិក បានរៀបចំ ពិធីអបអរបុណ្យរ៉ាម៉ាដាន ដើម្បីចូលរួមជាមួយសហគមន៍អ្នកកាន់សាសនាឥស្លាមនៅ ប្រទេសកម្ពុជា និងដើម្បីលើកកំពស់ភាពចំរុះគ្នានៃជំនឿសាសនា។
អ្នកសារព័ត៌មានដែលមានបំណងចូលរួមយកព័ត៌មានក្នុងពិធីនេះ ត្រូវចុះឈ្មោះអោយបានមុនម៉ោង ៣ រសៀល ថ្ងៃទី១ ខែសីហា ឆ្នាំ២០១២ ដោយទាក់ទងជាមួយផ្នែកកិច្ចការសាធារណៈរបស់ស្ថានទូតអាមេរិក តាមទូរស័ព្ទលេខ ០២៣ ៧២៨ ២៥៨ ឬអ៊ីម៉េលមក ChreaV@state.gov ។ ការចុះឈ្មោះ មានកំណត់។ សូមអញ្ជើញទៅដល់ស្ថានទូតសហរដ្ឋអាមេរិកអោយបានយ៉ាងហោចណាស់ ៣០ នាទី មុនពិធីចាប់ផ្តើម។
- Share
- Delicious
- Digg
- StumbleUpon