ថែរក្សាបរិស្ថាន
- បកប្រែ:
- English
សំរាមឬរបស់មានតំលៃ ការកែច្នៃយកមកប្រើប្រាស់ឡើងវិញ នៅភ្នំពេញ
ក្នុងពេលប៉ុន្មានខែកន្លងទៅនេះ ក្រុមបរិស្ថានរបស់ស្ថានទូត (Green Team) បានទាញការយកចិត្តទុកដាក់ទៅលើអ្វីៗទាំងអស់ រាប់ពីផលប៉ះពាល់នៃដបជ័រដាក់ទឹកដែលគេប្រើហើយបោះចោលដល់សារៈសំខាន់នៃការសន្សំសំចៃទឹក និងការចោលកាកសំណល់តាមគ្រួសារបានសមស្រប។
ខ្លឹមសាររួមមួយនៅក្នុងអត្ថបទជាច្រើនរបស់យើងគឺសារៈសំខាន់នៃការកែច្នៃយកមកប្រើឡើងវិញ។ ការនេះនាំអោយលោក អ្នក ដែលជាអ្នកអានដ៏វៃឆ្លាតរបស់យើងចោទជាសំណួររួមមួយថា “មិនអីទេ ការកែច្នៃយកមកប្រើប្រាស់ឡើងវិញមានសារៈសំខាន់ តែតើគេកែច្នៃយកមកប្រើឡើងវិញដោយរបៀបណា នៅភ្នំពេញ?”។
ដំណឹងល្អគឺថា មានជំរើសច្រើននៅទីក្រុងភ្នំពេញ រាប់ពីការជ្រើសរើសសំរាមនៅផ្ទះ។ អ្នករស់នៅជិតខាងរបស់អ្នកប្រហែលដឹងថា ពេលណាអ្នករើសអេតចាយ ឬអ្នករើសសំរាមមក។ អ្នករើសអេតចាយដើរគ្រប់កន្លែង នៅភ្នំពេញ ដោយរើសយកអ្វីដែលអាចយកទៅកែច្នៃប្រើប្រាស់ឡើងវិញបាន ឬទិញដោយផ្ទាល់ពីអ្នកស្រុក ហើយយកទៅលក់អោយកន្លែងកែច្នៃឡើងវិញ ដើម្បីបានចំណេញខ្លះ។ បើអ្នករើសដាក់ដោយឡែកពីគ្នានូវរបស់អាចកែច្នៃសំរាប់ប្រើប្រាស់ឡើងវិញបាន មុនពេលអ្នកដើររកអេតចាយមកដល់ នោះអ្នកធ្វើអោយពួកគេចំណេញពេល ដោយមិនបាច់អោយគេរើកកាយសំរាមរបស់អ្នក! តាមធម្មតា គេរើសយកកំប៉ុងអាលុយមីញូម តែសូមសួរនាំអ្នកក្បែរខាងរបស់អ្នកអំពីអ្នកដើរប្រមូលសំរាម ដែលមកផ្ទះរបស់អ្នក។
ខាងក្រោមនេះគឺជាព័ត៌មានល្អៗ ដែលអ្នកក្រុងភ្នំពេញប្រើ៖
- អង្គការមិនមែនរដ្ឋាភិបាលមួយចំនួន មានដូចជាអង្គការមិត្តសំលាញ់ជាដើម យករបស់ធ្វើពីក្រដាសទៅកែច្នៃជាសំភារៈដែលគេអាចលក់បាន ។ ការធ្វើដូច្នេះ ក្រៅពីជួយដល់បរិស្ថាន ផ្តល់ប្រយោជន៍ដល់សហគមន៍ដែលត្រូវការមុខរបរចិញ្ចឹមជីវិត។
- ក្រុមអ្នករកស៊ី ដែលមានឈ្មោះថាស្មាតារីយា មានគេហទំព័រនិងលេខទូរស័ព្ទ ០២៣ ២១១ ៧០១ ទទួលយកថង់កៅស៊ូ ប្រអប់ក្រដាសកាតុង ប្រអប់ទឹកដោះគោនិងទឹកផ្លែឈើ និងបំពង់ជ័របឺត។
- ក្រុមហ៊ុនមានឈ្មោះថាផ្រាមតិច (Prime Tech) ដែលមានអាស័យដ្ឋាន នៅអាគារលេខ ១០ អា ផ្លូវ ៣២៤ ខ័ណ្ឌទួលគោក លេខទូរស័ព្ទ ០១២ ៩៧៥ ៨០០ ឬ ០១១ ៩៧៥ ៨០០ ប្រមូលយកកំប៉ុងទឹកថ្នាំរបស់ម៉ាស៊ីនបោះពុម្ភ ហើយលក់កំប៉ុង ដែលត្រូវបានកែច្នៃយកមកប្រើវិញ។
- ហាងកុំព្យូទ័រអាណាណា នៅមជ្ឈមណ្ឌលភ្នំពេញ មានទទួលយកថ្មពិលទៅកែច្នៃសំរាប់ប្រើឡើងវិញ។
- មជ្ឈមណ្ឌលវះកាត់កុមារ ទទួលយកវែនតាអានអក្សរ និងវែនតាផ្សេងទៀត។
- អង្គការនានា ដូចជាអង្គការលីកាដូ (០២៣ ៣៦០ ៩៦៥) និងអង្គការមិត្តសំឡាញ់ ទទួលយកខោអាវ គ្រឿងប្រដាប់ប្រើប្រាស់អេឡិចត្រូនិច និងរបស់ផ្សេងទៀត សំរាប់ចែកដល់គ្រួសារក្រីក្រ ឬសំរាប់លក់។
អង្គការជាច្រើននៅភ្នំពេញដើរប្រមូលដល់ផ្ទះ ហើយនេះមិនមែនគ្រាន់តែជាជំរើសតែមួយ ក្នុងក្រុងទេ។
លើកក្រោយ នៅពេលអ្នកដើរមើលតាមហាង ក្នុងក្រុង ឬតូបក្នុងផ្សា ដែលមានលក់របស់ធ្វើពីសំភារៈកែច្នៃប្រើប្រាស់ឡើងវិញ ដូចជាផ្កានៅផ្សាទួលទំពូង ចូរសួរគេថាតើគេបានរបស់មកពីណា។ ក្រៅពីទិញរបស់ពីគេ ហើយជួយដល់បុព្វហេតុរបស់គេ គេប្រហែលជារកមើលអំណោយជាវត្ថុធាតុដើម ពីមនុស្សដូចជាអ្នក ជាដើម! នៅភ្នំពេញ ឬនៅជុំវិញពិភពលោក គេមានវិធីច្រើនយ៉ាងក្នុងការជួយកាត់បន្ថយបរិមាណកាកសំណល់នៅតាមផ្ទះ។ វិធីម្យ៉ាងក្នុងការធ្វើដូច្នេះគឺរើសទុករបស់ដែលអាចយកទៅកែច្នៃប្រើប្រាស់ឡើងវិញបាន មុនពេលចោលសំរាម។ នេះគឺជាជំហានងាយស្រួលមួយសំរាប់យើង ក្នុងការកាត់បន្ថយការបំពុលបរិយាកាសផែនដី ហើយមានការទទួលខុសត្រូវក្នុងការប្រើប្រាស់ធនធានធម្មជាតិ។ ក្រុមបរិស្ថានរបស់ស្ថានទូតនឹងចេះតែពង្រីកបញ្ជីនៃជំរើសក្នុងការកែច្នៃរបស់ប្រើហើយ យកមកប្រើឡើងវិញ នៅក្រុងភ្នំពេញ។