សុន្ទរកថា ក្នុងឆ្នាំ២០១២
- បកប្រែ:
- English
សុន្ទរថារបស់លោក Flynn Fuller នាយកទីភ្នាក់ងារ USAID នៅក្នុងពិធីចុះហត្ថលេខា លើអនុស្សារណៈនៃការយោគយល់ជាមួយ លេខាធិការដ្ឋានប្រឆាំងការជួញដូរមនុស្សរបស់គណកម្មាធិការជាតិ និង អង្គការ Winrock International
ថ្ងៃទី១៧ ខែធ្នូ ឆ្នាំ២០១២
លោកជំទាវ ជូ ប៊ុនអេង
លោកស្រី Sara Piazzano ប្រធាន និងអនុប្រធានក្រុមការងារ
ភ្ញៀវកិត្តិយស អស់លោក លោកស្រីជាទីមេត្រី
ការធ្វើជាសាក្សីក្នុងឱកាស ដ៏មានសារៈសំខាន់នេះធ្វើអោយខ្ញុំមោទនភាពយ៉ាងធំធេងចំពោះ។ យើងទាំងអស់ប្តេជ្ញាសារជាថ្មី ក្នុងការប្រយុទ្ធប្រឆាំងការជួញដូរមនុស្សនៅកម្ពុជា។ ថ្ងៃនេះ យើងប្រកាន់ជំហរដ៏សំខាន់មួយ។ វាគឺជាជំហរប្រឆាំងនឹងអំពើកេងប្រវ័ញ្ច។ នេះគឺជាជំហរប្រឆាំងនឹងបទឧក្រិដ្ឋ ប៉ុន្តែសំខាន់បំផុតនោះ គឺវាជាជំហរមួយដើម្បីយុវជនកម្ពុជា។
អំពើជួញដូរមនុស្ស គឺជាបញ្ហាមួយដែលប៉ះពាល់ ដល់មនុស្សគ្រប់រូប មិនថាតែជនរងគ្រោះប៉ុណ្ណោះទេ ប៉ុន្តែវាប៉ះពាល់ដល់ក្រុមគ្រួសារមិត្តភ័ក្រ្ត សហគមន៍ និងសង្គមទាំងមូលរបស់គេផងដែរ។ នេះហើយជាហេតុដែលធ្វើអោយខ្ញុំសប្បាយរីករាយ ដោយឃើញឆន្ទៈរបស់រាជរដ្ឋាភិបាលកម្ពុជា និងលោកជំទាវ ជូរ ប៊ុនអេង ចំពោះបញ្ហាដ៏មានសារៈសំខាន់នេះ។ ខ្ញុំមានកិត្តិយសបានធ្វើដំណើររួមជាមួយលោកជំទាវ ទៅក្រុងបោយប៉ែត ដែលនៅទីនោះ យើងទាំងអស់គ្នាបានឃើញ ដោយផ្ទាល់នឹងភ្នែកនូវផលប៉ះពាល់ យ៉ាងធំនៃអំពើជួញដូរមនុស្ស។
ក្នុងរយៈពេល៣ឆ្នាំនៅកម្ពុជា ខ្ញុំមានមោទនាភាព ដោយបានកត់សំគាល់ឃើញថា
កិច្ចសហការរបស់យើងជាមួយរាជរដ្ឋាភិបាលកម្ពុជា នៅក្នុងការប្រយុទ្ធប្រឆាំងអំពើជួញដូរមនុស្សមានភាពកាន់តែរឹងមាំជាលំដាប់។
បញ្ហានេះគឺជាកង្វល់ដ៏ចម្បង របស់រដ្ឋាភិបាលសហរដ្ឋអាមេរិក។ កាលពីខែកញ្ញាកន្លងទៅនេះ លោកប្រធានាធិបតី អូបាមា បានមានប្រសាសន៍ ក្នុងឱកាស ដែលលោកថ្លែងទៅកាន់អង្គការមួយ ដែលធ្វើការប្រយុទ្ធប្រឆាំងអំពើជួញដូរមនុស្សថា “ការប្រយុទ្ធប្រឆាំងអំពើជួញដូរមនុស្សរបស់យើង គឺជាបុព្វហេតុសិទ្ធមនុស្សដ៏មានសារៈសំខាន់នៃសម័យកាលរបស់យើងនេះ ហើយសហរដ្ឋអាមេរិកនឹងបន្តការដឹកនាំការប្រយុទ្ធនេះ ក្នុងភាពជាដៃគូជាមួយអ្នកទាំងអស់គ្នា” ។
ខណៈពេលដែលឆន្ទៈរបស់លោកជំទាវក្នុងការប្រយុទ្ធប្រឆាំងអំពើជួញដូរមនុស្ស ត្រូវបានទទួលស្គាល់យ៉ាងទូលំទូលាយ ខ្ញុំសង្ឃឹមថាយើងនឹងបានឃើញការចូលរួម យ៉ាងខ្លាំងក្លាដូចគ្នានេះពីសំណាក់មន្រ្តីជាន់ខ្ពស់ នៃរាជរដ្ឋាភិបាលកម្ពុជា។
ឱកាសនេះមិនមែនជាចំណុច “ចាប់ផ្តើម”ទេ ។ វាគឺជា “ការបន្ត”។ អនុស្សារណៈនៃការយោគយល់នេះ មិនកំហិតព្រំដែនលើការខិតខំប្រឹងប្រែងរបស់យើងទេ។ វាគឺជាមូលដ្ឋាននៃកិច្ចសហការ ដ៏ធំធេងរបស់យើង។ អ្នកទាំងអស់គ្នាដែលធ្វើការងារប្រយុទ្ធប្រឆាំងការជួញដូរមនុស្ស សូមមានភាពក្លាហានឡើង។ យើងនៅពីក្រោយអ្នក។ យើងនឹងទទួលជ័យជំនះក្នុងការប្រយុទ្ធនេះទាំងអស់គ្នា។ សូមអរគុណ!