2012 Speeches
- បកប្រែ:
- English
សុន្ទរកថារបស់លោកមន្រ្តីសេដ្ឋកិច្ច David Myers នៅក្នុងពិធីបើកកន្លែងលក់ថ្មី របស់ក្រុមហ៊ុនរថយន្ត Ford
ភ្នំពេញ | ថ្ងៃទី១៦ ខែវិច្ឆិកា ឆ្នាំ២០១២
(ត្រូវបានរៀបចំសំរាប់ថ្លែង)
សូមជំរាបសួ ឯកឧត្តម ម៉ៅ ធូរ៉ា លោកស្រី Elena Ford ឯកឧត្តម លោកជំទាវ ភ្ញៀវកិត្តិយស អស់លោក លោកស្រី។ ខ្ញុំមានសេចក្តីរីករាយ ដោយមានវត្តមាន នៅព្រឹកនេះ ដើម្បីអបអរទីតាំងលក់ថ្មីរបស់ក្រុមហ៊ុនរថយន្ត Ford ។
Ford គឺជាម៉ាកដ៏ពេញនិយមរបស់អាមេរិក ហើយជានិមិត្តរូបនៃគុណភាព ការបញ្ចូលគំនិតច្នៃប្រឌិតថ្មី និងភាពស្វិតស្វាញ។ ដោយទុករឿងផ្សាយពាណិជ្ជកម្មដោយឡែកសិន ពាក្យនេះមានន័យច្រើន ដែលបញ្ជាក់ពីភាពធន់បានយូររបស់រថយន្តម៉ាក Ford។ រថយន្ត Ford អាចទ្រាំបាននឹងស្ថានភាពផ្លូវពិបាក។ នេះគឺជាប្រយោជន៍មួយនៅតាមផ្លូវខ្លះ ក្រៅក្រុងភ្នំពេញ។ វាគឺជាបាវចនាសមស្របចំពោះក្រុមហ៊ុនរថយន្ត ដែលត្រូវបានបង្កើតឡើងដោយលោក Henry Ford ដែលបាននិយាយថា “គុណភាពមានន័យថា ធ្វើត្រឹមត្រូវ នៅពេលគ្មាននរណាម្នាក់មើល”។
នៅដើមទសវត្សឆ្នាំ ១៩០០ លោក Henry Ford ដែលជាស្ថាបនិក របស់ក្រុមហ៊ុន មានបំណងធ្វើអោយមនុស្សប្រុស ស្រីសាមញ្ញអាចមានលទ្ធភាពទិញរថយន្តបាន។ ការខិតខំដំបូងៗរបស់លោកមិនទទួលបានជោគជ័យទេ តែលោកនៅតែមិនបោះបង់ការខិតខំទាំងនោះទេ ដោយលោកបានបែរទៅរកការងារដំបូងៗវិញជាច្រើនលើក ហើយនៅទីបំផុតបានផ្តើមផលិតរថយន្តម៉ាក Model T នៅឆ្នាំ១៩០៨។ រថយន្តគួរអោយចាប់អារម្មណ៍នេះងាយបើក មានគុណភាពខ្ពស់ ងាយជួសជុល ហើយមានតំលៃថោក។ ជនជាតិអាមេរិកដែលស្ថិតក្នុងវណ្ណៈកណ្តាលមានលទ្ធភាពទិញរថយន្តនេះបាន ហើយការខិតខំរបស់លោក ជាញឹកញាប់ត្រូវបានគេលើកឡើងថា ជាកំលាំងជំរុញមួយនៅពីក្រោយការបង្កើតវណ្ណៈកណ្តាលនៅសហរដ្ឋអាមេរិក។ បច្ចុប្បន្ននេះ សេចក្តីថ្លែងស្តីពីបេសកកម្មរបស់ក្រុមហ៊ុននៅតែផ្តោតការយកចិត្តទុកដាក់ទៅលើអតិថិជន គំនិតច្នៃប្រឌិត ភាពវាងវៃ និងស្មារតីសហគ្រិនដដែល។ វាជាការត្រឹមត្រូវណាស់ដែលយើងអបអរការបើកទីតាំងលក់ថ្មីរបស់ក្រុមហ៊ុនមួយដែលមានគំនិតច្នៃប្រឌិតខ្ពស់ ក្នុង “សប្តាហ៍ទេព្យកោសល្យសហគ្រាស”។
ក្នុងពេលថ្មីៗនេះ ក្រុមហ៊ុន Ford បានចាប់ផ្តើមដំឡើងរថយន្តម៉ាក Ford Everest នៅប្រទេសកម្ពុជា ដោយផ្តល់ការសន្សំប្រាក់បន្ថែម ដល់អ្នកប្រើប្រាស់រថយន្តនេះ។ ដោយយល់ឃើញថា តំលៃរថយន្តប្រភេទ SUV មួយមានតំលៃគិតជាមធ្យមចំនួន ១០០ ០០០ ដុល្លាអាមេរិក ដែលប្រជាជនខ្មែរភាគច្រើនគ្មានលទ្ធភាពទិញបាន ក្រុមហ៊ុន Ford បានផ្តើមដំណោះស្រាយប្រកបដោយការច្នៃប្រឌិតមួយ ដែលជួយឧស្សាហកម្មថ្មីផង ផ្តល់រថយន្តប្រើប្រាស់ថ្មីប្រកបដោយគុណភាព ក្នុងតំលៃសមរម្យផង។
ខ្ញុំសូមជំរាបថា នៅពេលខ្ញុំនិយាយពីគុណភាពប្រសើរជាច្រើនរបស់រថយន្ត Ford ការនិយាយនេះគឺចេញពីបទពិសោធន៍ផ្ទាល់ខ្លួនរបស់ខ្ញុំ។ រថយន្តដែលខ្ញុំបើកដំបូងគឺរថយន្តម៉ាក Ford Probe ដែលមានតំលៃថោក រូបរាងល្អ ហើយមិនដែលខូច។ ក្នុងរយៈពេលនៅក្នុងដៃរបស់ខ្ញុំចំនួន ១០ ឆ្នាំ ខ្ញុំគ្រាន់តែត្រូវប្តូរអាគុយ និងប្រេងម៉ាស៊ីនតែប៉ុណ្ណោះ។ នៅរដ្ឋអាយូវ៉ា ដែលមានរដូវរងាវែង ហើយត្រជាក់ខ្លាំង រថយន្តដែលយើងមានទំនុកចិត្តទៅលើគឺមានសារៈសំខាន់ណាស់។ ដូច្នេះ នៅពេលខ្ញុំលឺពាក្យថា “រថយន្ត Ford មាំ” ខ្ញុំមិនគ្រាន់តែលឺពាក្យផ្សាយពាណិជ្ជកម្មតែប៉ុណ្ណោះទេ តែខ្ញុំនឹកដល់ពេលជាច្រើនដែលខ្ញុំបានអង្គុយក្នុងពេលព្រឹកដ៏ត្រជាក់ហើយងងឹត ដោយមានទឹកកកគ្របលើបង្អួចទាំងអស់ ជាមួយសោរកំពុងប៉ះគ្នាលាន់លឺរ៉ឺងៗនៅក្នុងដៃ ដែលកំពុងញ័រ និងការបន់ស្រន់ថា ឡាននឹងឆេះ ហើយនាំខ្ញុំទៅដល់ផ្ទះអោយជួបជុំគ្រួសារ ទាន់ពេលនៅថ្ងៃបុណ្យណូអែល។ លោកអ្នកដឹងទេថា ឡានឆេះ ហើយនាំខ្ញុំដល់ផ្ទះជានិច្ច។
នៅទីបញ្ចប់ ខ្ញុំសូមនិយាយថា ខ្ញុំសង្ឃឹមថា ចក្ខុវិស័យ ចិត្តលុះ និងភាពក្លាហានរបស់ក្រុមហ៊ុនរថយន្ត Ford ក្នុងការមករកស៊ីនៅប្រទេសកម្ពុជា នឹងបំផុសអោយក្រុមហ៊ុនអាមេរិកដទៃទៀតធ្វើតាម។ នៅដើមឆ្នាំនេះ ក្រុមហ៊ុនរថយន្ត Ford បានផ្តើមពាក្យស្លោកថ្មីមួយ ដែលមានន័យថា “ទៅមុខឆ្ងាយ” ជាងអ្នកដទៃជាច្រើន។ សូមអបអរសាទរ ហើយសូមអោយក្រុមហ៊ុនទទួលបានជោគជ័យបន្តទៀត។ សូមអរគុណឡាន Ford ដែលតែងតែនាំខ្ញុំទៅដល់ផ្ទះនៅថ្ងៃបុណ្យណូអែល។ សូមអរគុណ។