សុន្ទរកថា ក្នុងឆ្នាំ២០១២
- បកប្រែ:
- English
សុន្ទរកថារបស់លោកឧត្តមនាវីទោ Carney មេបញ្ជាការកងកំលាំងពិសេសលេខ ៧៣ ក្នុងពិធីបិទលំហាត់សមយុទ្ធ CARAT នៅកម្ពុជា
ថ្ងៃទី២២ ខែតុលា ឆ្នាំ២០១២
អរុណសួស្ដី។ មុននឹងយើងចាប់ផ្ដើមកម្មវិធី សូមអនុញ្ញាតឲ្យយើងខ្ញុំចូលរួមសម្ដែងការសោកស្ដាយចំពោះការចូលទិវង្គត នៃព្រះបាទសម្ដេច នរោត្តមសីហនុ ព្រះបិតាជាតិនៃកម្ពុជា ហើយសូមចូលរួមមរណៈទុក្ខដ៏ក្រៀមក្រំជាទីបំផុតជាមួយព្រះបាទសម្ដេច នរោត្តមសីហមុនី ព្រះរាជអគ្គមហេសី នរោត្ដម មុនីនាថ ព្រះរាជវង្សានុវង្សទាំងមូល និងប្រជាជនកម្ពុជាទាំងអស់ ចំពោះការបាត់បង់ដ៏ធំធេងនេះ។
ខ្ញុំសូមថ្លែងអំណរគុណចំពោះឧត្តមនាវីទោ រស់ វាសនា និងបុគ្គលិកទាំងអស់របស់លោកដែលតែងបង្ហាញនូវបដិសណ្ឋារកិច្ចដ៏កក់ក្ដៅនិងស្វាគមន៍យើងខ្ញុំក្នុងការវិលត្រឡប់មកខេត្តព្រះសីហនុជាថ្មីម្ដងទៀត សម្រាប់លំហាត់ការាត់នៅកម្ពុជា ជាលើកទីបីនេះ។
ពីរឆ្នាំបានកន្លងផុតទៅយ៉ាងឆាប់រហ័ស គិតចាប់តាំងពីការចាប់ផ្ដើមដំបូងនៃការាត់នៅកម្ពុជាក្នុងឆ្នាំ ២០១០ ដែលជាព្រឹត្តិការណ៍លំហាត់ហ្វឹកហ្វឺន របស់កងទ័ពជើងទឹករវាងសហរដ្ឋអាមេរិកនិងព្រះរាជាណាចក្រកម្ពុជា។ ចាប់តាំងពីពេលនោះមក កងទ័ពជើងទឹកនៃប្រទេសយើងទាំងពីរបានបន្តធ្វើឲ្យលំហាត់ការាត់នេះកាន់តែមានភាពប្រសើរឡើងជាលំដាប់ ពីមួយឆ្នាំ ទៅមួយឆ្នាំ។ ខ្ញុំមានទំនុកចិត្តថាព្រឹត្តិការណ៍នៃលំហាត់ការាត់ ឆ្នាំ២០១២ ទាំងលើគោក និងលើផ្ទៃទឹក ដែលបានត្រៀមរៀបចំយ៉ាងល្អជាមុននេះ នឹងបង្ហាញឲ្យឃើញពីវឌ្ឍនភាពដែលកើនឡើងជាលំដាប់របស់យើង។
ក្នុងពេលយើងកំពុងតែប្រារព្វពិធីបើកជាផ្លូវការនេះ ការហ្វឹកហាត់រវាងកងទ័ពជើងទឹកយើងទាំងពីរបានចាប់ផ្ដើមតាំងពីពីរសប្ដាហ៍មុនមកម្លេះ។ នាវារបស់សហរដ្ឋអាមេរិកចំនួនពីរគ្រឿង ដែលមានឈ្មោះថា USNS Safeguard និង USNS Salvor ទើបតែបានបញ្ចប់ការហ្វឹកហាត់វិធីមុជចុះក្នុងទឹកនិងការថែទាំឧបករណ៍។ កងទ័ពម៉ារីនរបស់សហរដ្ឋអាមេរិក ក៏បានហ្វឹកហាត់ជំនាញនិងនីតិវិធីការពារប្រឆាំងនឹងភេរវកម្ម ជាមួយកងរាជអាវុធហត្ថផងដែរ។
លំហាត់ការាត់គឺជាផ្នែកមួយនៃទំនាក់ទំនងការពារជាតិដ៏ទូលំទូលាយរវាងសហរដ្ឋអាមេរិកនិងព្រះរាជាណាចក្រកម្ពុជា។ នាវារបស់កងទ័ពជើងទឹកសហរដ្ឋអាមេរិក តែងចូលមកទស្សនកិច្ចនៅទីនេះជាប្រចាំ។ នាវា USS Blue Ridge នៃកងនាវាទី៧ របស់សហរដ្ឋអាមេរិក បានមកខេត្តព្រះសីហនុកាលពីខែមេសា។ ព្រឹត្តិការណ៍ចុងក្រោយបង្អស់ដែលទើបបញ្ចប់ទៅនេះ គឺជាកម្មវិធីនៃភាពជាដៃគូក្នុងតំបន់ប៉ាស៊ីហ្វិក ដែលបានធ្វើឡើងនៅក្នុងប្រទេសកម្ពុជាដែរ។ កិច្ចប្រជុំពិភាក្សាទ្វេរភាគីប្រចាំឆ្នាំ ស្ដីពីការការពារជាតិរវាងសហរដ្ឋអាមេរិកនិងកម្ពុជាក៏ទើបបានបញ្ចប់ទៅកាលពីខែសីហា នៅក្នុងទីខេត្តសៀមរាប ផងដែរ។
ក្នុងរយៈពេល ៥ ថ្ងៃខាងមុខនេះ សិក្ខាកាមមកពីសហរដ្ឋអាមេរិកនិងកម្ពុជា សរុបចំនួនប្រហែល ៨០០ នាក់ នឹងចូលរួមធ្វើលំហាត់ជាបន្តបន្ទាប់ទាំងនៅលើគោកផង និងលើផ្ទៃទឹកផង។ រាល់ព្រឹត្តិការណ៍ទាំងអស់នេះនឹងជួយបង្កើនលទ្ធភាពអន្តរប្រតិបត្តិការ លើកកំពស់ការយល់ដឹង និងកសាងទំនុកចិត្តរបស់កងទ័ពជើងទឹកនៃប្រទេសយើងទាំងពីរ។
ពេលកំពុងចូលចតក្នុងផែនេះ សកម្មភាពផ្លាស់ប្ដូរបទពិសោធន៍ជំនាញ ការប្រជុំពិភាក្សាក្រៅផ្លូវការ នឹងត្រូវធ្វើឡើងក្នុងគោលបំណងឲ្យកងទ័ពជើងទឹកនៃប្រទេសទាំងពីរបានអនុវត្តរួមគ្នា និងពង្រឹងមិត្តភាពជាមួយគ្នាក្នុងពេលតែមួយ។ មេរៀនទ្រឹស្ដីនិងការអនុវត្តជាក់ស្ដែងក្នុងលំហាត់នេះរួមមានដូចជា ជំនាញកងម៉ារីន ការឡើងនាវា ការឆែកឆេរ និងការរឹបអូស ការគ្រប់គ្រងការខូចខាត និងការនាំផ្លូវនាវាជាដើម។ល។ ក្នុងការបន្តនូវជំនាញការពារសន្តិសុខ ដែលបានចាប់ផ្ដើមតាំងពីសប្ដាហ៍មុន នៅក្នុងសប្ដាហ៍នេះ កងទ័ពម៉ារីននិងកងរាជអាវុធហត្ថ នឹងពង្រីកមេរៀនយ៉ាងច្រើនថែមទៀត បើធៀបនឹងឆ្នាំមុនៗ។
ក្នុងលំហាត់ ៣៥ ម៉ោងនៅលើផ្ទៃទឹក នាវា Vandegrift នឹងចាប់ផ្ដើមជាមួយនឹងនាវាពីរគ្រឿងរបស់កងទ័ពជើងទឹកកម្ពុជា ហើយសកម្មភាព នៃការហ្វឹកហាត់មានដូចជា ការរៀបចំក្បួននាវា លំហាត់បាញ់គ្រាប់ពិតលើផ្ទៃទឹក និងជំនាញការពារសន្តិសុខលំហរសមុទ្រ។ ក្នុងចំណោមព្រឹត្តិការណ៍ទាំងឡាយ ព្រឹត្តិការណ៍សំខាន់មួយនៅលើផ្ទៃទឹកគឺលំហាត់ប្រដេញ ស្វែងរក និងឆែកឆេរនាវាសង្ស័យផ្ទុកសម្ភារខុសច្បាប់ ដែលនេះចាត់ទុកថាជាលំហាត់មួយដ៏សំខាន់ សម្រាប់ឆ្លើយតបទៅនឹងកង្វល់រួមផ្នែកសន្តិសុខនៅលើលំហសមុទ្រ។
ព្រឹត្តិការណ៍សំខាន់មួយទៀតគឺសកម្មភាពលើកកំពស់ចំណងមិត្តភាពនិងការយល់ដឹងពីគ្នាទៅវិញទៅមករវាងប្រជាជនយើងទាំងពីរតាមរយៈគម្រោងសេវាកម្មតាមសហគមន៍ ដែលផ្ដល់នូវកាលានុវត្តភាពសម្រាប់ក្រុមនាវិកអាមេរិក និងកម្ពុជា អាចលេងកីឡាជាមួយគ្នា និងល្បែងកំសាន្តជាមួយសិស្សសាលាក្នុងមូលដ្ឋាន។ នៅពាក់កណ្ដាលសប្ដាហ៍នេះ ក្រុមតន្រ្តីនៃនាវាកងនាវាទី៧ ដែលមានឈ្មោះថា ក្រុមតន្រ្តី Orient Express នឹងទៅលេងល្បែងកំសាន្តជាមួយកុមារនៅក្នុងខេត្តព្រះសីហនុ ហើយនឹងប្រគុំតន្រ្តីនៅក្នុងខេត្តកំពត ព្រះរាជាណាចក្រកម្ពុជា។
ទិសស្លោករួមសម្រាប់សកម្មភាពប្រចាំសប្ដាហ៍នេះគឺពាក់ព័ន្ធ នឹងតួនាទីដ៏សំខាន់នៃអន្តរសកម្មភាពផ្ទាល់ខ្លួនរវាងអ្នកជំនាញ នៅក្នុងជួរកងទ័ពជើងទឹករបស់យើងទាំងពីរ។ ប្រសិនបើមិនមានតួនាទីដ៏សំខាន់នេះទេ លំហាត់ការាត់មិនអាចមានវឌ្ឍនភាពប្រកបដោយអត្ថន័យបានឡើយ។
ក្នុងពេលយើងចាប់ផ្ដើមលំហាត់ ដែលបានរៀបចំជាមុននេះ ខ្ញុំសូមលើកទឹកចិត្តឲ្យមន្រ្តីនិងនាវិកទាំងអស់ ទាំងខាងភាគីអាមេរិកនិងភាគីកម្ពុជា ស្វែងរកជួបគ្នាទៅវិញទៅមកដើម្បីមានឱកាសឆាប់បានស្គាល់គ្នាក្នុងលក្ខណៈផ្ទាល់ខ្លួន ហើយប្រែក្លាយទំនាក់ទំនងនេះទៅជាចំណងមិត្តភាព ដែលនាំមកនូវផលប្រយោជន៍ សម្រាប់ជាតិយើងតទៅអនាគត។