សុន្ទរកថា ក្នុងឆ្នាំ២០១២
- បកប្រែ:
- English
សុន្ទរកថារបស់លោកឯកអគ្គរដ្ឋទូត William E. Todd ក្នុងឱកាសបើកមជ្ឈមណ្ឌលផ្តល់ប្រឹក្សា ស្តីពីការសិក្សាអប់រំ នៅសហរដ្ឋអាមេរិក
ថ្ងៃទី៣ ខែតុលា ឆ្នាំ២០១២ | សាកលវិទ្យាល័យបញ្ញាសាស្រ្ត នៃកម្ពុជា
(ត្រូវបានរៀបចំសំរាប់ថ្លែង)
សួរស្តី ឯកឧត្តម បណ្ឌិត កុល ផេង ក្រុមសាស្រ្តាចារ្យ និងនិស្សិត
ខ្ញុំមានសេចក្តីរីករាយ ដោយមានវត្តមាន នៅសាកលវិទ្យាល័យបញ្ញាសាស្រ្តនៃកម្ពុជា ក្នុងពេលនេះ។ ដូចលោកអ្នកជាច្រើនបានដឹងហើយ បំណងរបស់ខ្ញុំក្នុងនាមជាឯកអគ្គរដ្ឋទូតសហរដ្ឋអាមេរិក គឺដើម្បីពង្រឹងទំនាក់ទំនងដៃគូអោយកាន់តែមានប្រសិទ្ធភាពថែមទៀត ជាមួយប្រទេសកម្ពុជាទាំងមូល គឺជាមួយរដ្ឋាភិបាល ស្ថាប័នរដ្ឋាភិបាល ហើយសំខាន់បំផុតនោះ គឺជាមួយប្រជាជនកម្ពុជា។
វិធីជាគន្លឹះមួយដើម្បីសំរេចបំណងនេះគឺតាមរយៈការអប់រំ។ តាមរយៈការអប់រំប្រទេសកម្ពុជាអាចប្រែក្លាយជាប្រទេសមានវិបុលភាពល្អ។ ហេតុដូច្នេះហើយបានជាថ្ងៃនេះមានសារៈសំខាន់ ពីព្រោះថ្ងៃនេះ យើងបើកជាផ្លូវការនូវមជ្ឈមណ្ឌលថ្មីបំផុត សំរាប់ផ្តល់ប្រឹក្សាស្តីពីការអប់រំ នៅសហរដ្ឋអាមេរិក នៅប្រទេសកម្ពុជា ដែលផ្តល់ដល់ប្រទេសកម្ពុជានូវឱកាសថ្មីមួយ។
កន្លែងដែលទើបជួសជុលនេះគឺជាសញ្ញានៃការប្តេជ្ញាចិត្តរបស់ប្រទេសអាមេរិក ចំពោះប្រទេសកម្ពុជា ជាពិសេសយុវជន។ ដោយសារជាង ៧០% នៃប្រជាជនកម្ពុជាមានអាយុក្រោម ៣០ ឆ្នាំ ដែលសប្បាយនឹងការសិក្សាអប់រំ ខ្ញុំជឿថាមជ្ឈមណ្ឌលនេះនឹងជួយដល់ការសិក្សាអប់រំរបស់មេដឹកនាំជំនាន់ក្រោយ។
ខ្ញុំជឿថា មជ្ឈមណ្ឌលនេះមិនត្រឹមតែផ្តល់ដល់យុវជនកម្ពុជានូវលទ្ធភាពកាន់តែច្រើនក្នុងការទទួលបានឱកាសរៀនសូត្រនៅសហរដ្ឋអាមេរិកតែប៉ុណ្ណោះទេ តែថែមទាំងរួមចំណែក ដល់អនាគតភ្លឺស្វាង សំរាប់ប្រទេសកម្ពុជាផងដែរ។
គេអាចមកសួរសំណួរ ដោយផ្ទាល់នៅមជ្ឈមណ្ឌលសំរាប់ផ្តល់ប្រឹក្សាស្តីពីការអប់រំ នៅសហរដ្ឋអាមេរិកទាក់ទងនឹងការសិក្សានៅសហរដ្ឋអាមេរិក។ យើងផ្តល់ដល់និស្សិតនូវការណែនាំផ្ទាល់ស្តីពីវិធីរកមើលសាកលវិទ្យាល័យ និងឱកាសទទួលបានអាហាររូបករណ៍ ផ្តល់ព័ត៌មានស្តីពីកម្មវិធីដែលឧបត្ថម្ភដោយរដ្ឋាភិបាលសហរដ្ឋអាមេរិក និងជួយក្នុងការដាក់ពាក្យ និងការសរសេរនិពន្ធសំរាប់ការចូលរៀននៅមហាវិទ្យាល័យ។
នៅទីបញ្ចប់ ខ្ញុំសូមអរគុណបណ្ឌិត កុល ផេង និងបុគ្គលិករបស់លោក ដែលបានធ្វើការបានយ៉ាងល្អ។ ខ្ញុំសូមអរគុណគ្រប់គ្នា ដែលមានវត្តមានក្នុងពិធីកាត់ខ្សែបូរថ្ងៃនេះ។ ខ្ញុំសូមលើកទឹកចិត្តអោយគ្រប់គ្នាប្រើសេវា ដែលផ្តល់ដោយមជ្ឈមណ្ឌលនេះ ហើយទៅសិក្សានៅសហរដ្ឋអាមេរិក។
សូមជូនពរដល់លោកអ្នកទាំងអស់គ្នា សូមជូនពរដល់ប្រទេសកម្ពុជា និងសូមជូនពរដល់ប្រទេសអាមេរិក។ សូមអរគុណ។