សុន្ទរកថា ក្នុងឆ្នាំ២០១២
- បកប្រែ:
- English
សុន្ទរកថារបស់លោក Flynn Fuller ប្រធានទីភ្នាក់ងារ USAID នៅក្នុងសិក្ខាសាលាពិគ្រោះយោបល់ថ្នាក់ជាតិ ស្តីពីការកំណត់សូចនាការនៃជីវសាស្រ្តចំរុះ និងគោលដៅថ្នាក់ជាតិ
សណ្ឋាគារសាន់វ៉េ ក្រុងភ្នំពេញ | ថ្ងៃទី៤ ខែកញ្ញា ឆ្នាំ២០១២
(ត្រូវបានរៀបចំសំរាប់ថ្លែង)
សូមអរគុណឯកឧត្តមបណ្ឌិតម៉ុក ម៉ារ៉េត ទេសរដ្ឋមន្រ្តីក្រសួងបរិស្ថាន ដែលបានអញ្ជើញមកចូលរួមថ្ងៃនេះ ដើម្បីបើកសិក្ខាសាលាពិគ្រោះយោបល់នេះ និងសូមអរគុណអស់លោក លោកស្រីទាំងអស់ ដែលមានវត្តមាន នៅថ្ងៃនេះ ដើម្បីកំណត់សូចនាករនៃជីវសាស្រ្តចំរុះ និងពិភាក្សាពីគោលដៅថ្នាក់ជាតិដោយធ្វើការផ្ទៀងផ្ទាត់នឹងសូចនាករទាំងនោះ។
តាមរយៈទីភ្នាក់ងារសហរដ្ឋអាមេរិក សំរាប់ការអភិវឌ្ឍន៍អន្តរជាតិ (USAID) រដ្ឋាភិបាលសហរដ្ឋអាមេរិក ផ្តល់ជំនួយមនុស្សធម៌ ជំនួយអភិវឌ្ឍន៍ និងជំនួយសេដ្ឋកិច្ច នៅជុំវិញពិភពលោក ក្នុងការគាំទ្រដល់គោលដៅ នៃនយោបាយការបរទេសរបស់សហរដ្ឋអាមេរិក និងក្នុងការគាំទ្រ ដល់ភាពជាដៃគូជាមួយប្រទេសម្ចាស់ផ្ទះ ដូចជាប្រទេសកម្ពុជា។
វាជាការមួយនាំអោយមានការលើកទឹកចិត្ត ដែលគេឃើញមន្រ្តីរដ្ឋាភិបាល តំណាងវិស័យឯកជន និងតំណាងសង្កមស៊ីវិលធ្វើការជាមួយគ្នា ដើម្បីកំណត់គោលដៅ សំរាប់ការអភិរក្សជីវសាស្រ្តចំរុះដ៏សំបូរបែបរបស់ប្រទេសកម្ពុជា។
យើងសង្ឃឹមថា ដំណើរដែលមានលក្ខណៈជាការចូលរួមគ្នាទាំងនេះ និងដំណើរការដទៃទៀតដែលមានលក្ខណៈដូចគ្នានេះ ក្នុងពេលរាប់ខែ និងឆ្នាំខាងមុខ នឹងរួមចំណែកធ្វើអោយមានសកម្មភាព ដែលអាចសំរេចបាន និងលទ្ធផលប្រកបដោយនិរន្តភាព។ ទីភ្នាក់ងារ USAID មានការប្តេជ្ញាក្នុងការធ្វើការសំរបសំរួលជិតស្និទ្ធជាមួយស្ថាប័ន របស់រាជរដ្ឋាភិបាលកម្ពុជា ក្នុងការអនុវត្តសកម្មភាពទាំងនេះ និងការសំរេចបានលទ្ធផលទាំងនេះ។
ការតាំងចិត្តរបស់យើងចំពោះភាពជាដៃគូត្រូវបានបង្ហាញតាមរយៈកម្មវិធី ដែលមានឈ្មោះថា HARVEST របស់ទីភ្នាក់ងារ USAID និងកម្មវិធីខាងមុខរបស់យើងសំរាប់ការគ្រប់គ្រងប្រកបដោយនិរន្តភាពលើព្រៃឈើ សំរាប់តំបន់សំខាន់ៗនៃប្រទេសកម្ពុជា។ ការងារសហការគ្នានេះគឺជានិមិត្តរូបនៃការប្តេជ្ញាចិត្តយូរអង្វែង របស់យើងចំពោះភាពជាដៃគូជាមួយប្រទេសកម្ពុជា។
ការងាររបស់អស់លោកអ្នកនៅទីនេះ ក្នុងថ្ងៃនេះ ដើម្បីរៀបចំសូចនាករ និងគោលដៅជីវសាស្រ្តចំរុះថ្មីៗគឺជាជំហានដំបូង ដែលចាំបាច់ដើម្បីសើរើផែនការសកម្មភាពជាយុទ្ធសាស្រ្តថ្នាក់ជាតិផ្នែកជីវសាស្រ្តចំរុះរបស់ប្រទេសកម្ពុជា។ ទីភ្នាក់ងារ USAID រីករាយដោយយើងអាចជួយការងាររបស់លោកអ្នកក្នុងកិច្ចខិតខំនេះ។ នៅខែតុលា ទីភ្នាក់ងារ USAID នឹងឧបត្ថម្ភមន្រ្តី ២ រូបមកពីអគ្គនាយកដ្ឋានរដ្ឋបាល សំរាប់ការការពារ និងអភិរក្សធម្មជាតិ របស់ក្រសួងបរិស្ថាន ក្នុងការចូលរួមក្នុងសន្និសីទនៅពេលខាងមុខ នៃភាគីហត្ថលេខីនៃអនុសញ្ញាសហប្រជាជាតិស្តីពីជីវសាស្រ្តចំរុះ ដែលនឹងប្រព្រឹត្តទៅនៅប្រទេសឥណ្ឌា។
ខ្ញុំសូមបញ្ជាក់ជាថ្មីម្តងទៀតថា ទីភ្នាក់ងារ USAID មានការតាំងចិត្តចំពោះភាពជាដៃគូជាមួយប្រទេសកម្ពុជា ហើយយើងមានការប្តេជ្ញាចិត្តក្នុងការធ្វើការជាមួយគ្នា ដើម្បីបង្កើតផែនទីបង្ហាញផ្លូវមួយ ដើម្បីរក្សា និងពង្រឹងជីវសាស្រ្តចំរុះដ៏សំបូរបែបរបស់ប្រទេសកម្ពុជា។
សូមអរគុណ ឯកឧត្តមចំពោះការដឹកនាំរបស់ឯកឧត្តម ហើយសំខាន់ផងដែរ សូមអរគុណដល់អស់លោក លោកស្រីទាំងអស់ដែលបានអញ្ជើញមកចូលរួម ក្នុងការកំណត់ផែនទីផ្លូវសំរាប់អភិរក្សជីវសាស្រ្តចំរុះនៃប្រទេសកម្ពុជា។
សូមអរគុណច្រើន!
