សុន្ទរកថា ឆ្នាំ ២០១២
- បកប្រែ:
- English
អត្ថបទវិចារណកថារបស់លោក Jeff Daigle ភារធារីស្ថានទូតអាមេរិក៖ ផ្តល់កិត្តិយសដល់ស្រ្តីក្នុងយុគសម័យនៃការចូលរួម
ថ្ងៃទី ៨ ខែមិនា ឆ្នាំ ២០១២
ក្នុងពេលយើងប្រារព្ធទិវានារីអន្តរជាតិ ខ្ញុំសូមបន្ទរតាមប្រសាសន៍របស់លោកស្រី Hillary Rodham Clinton រដ្ឋមន្រ្តីក្រសួងការបរទេសសហរដ្ឋអាមេរិក ដែលបានមានប្រសាសន៍ថា៖
“អ្វីដែលយើងកំពុងរៀនសូត្រនៅជុំវិញពិភពលោកគឺថា បើស្រ្តីមានសុខភាពបរិបូរ ហើយមានការសិក្សានោះ គ្រួសាររបស់គេនឹងសំបូរសប្បាយ។ បើស្រ្តីមិនទទួលរងនូវអំពើហឹង្សានោះ គ្រួសារបស់គេនឹងសំបូរសប្បាយ។ បើស្រ្តីមានឱកាសមានការងារធ្វើ ហើយរកចំណូលបានក្នុងនាមជាដៃគូស្មើភាព និងពេញលេញក្នុងសង្គមនោះ គ្រួសាររបស់គេនឹងសំបូរសប្បាយ ហើយនៅពេលគ្រួសាររបស់គេសំបូរសប្បាយនោះ សហគមន៍និងប្រទេសជាតិ នឹងសំបូរសប្បាយផងដែរ”។
ពាក្យទាំងនេះមានលក្ខណៈត្រឹមត្រូវជាពិសេស ក្នុងពេលនេះដែលយើងធ្វើការអបអរការរួមចំណែករបស់ស្រ្តីនៅជុំវិញពិភពលោក និងនៅពេលដែលយើងបន្តបោះជំហានទៅមុខដើម្បីជោគជ័យរបស់ស្រ្តី។
តែក្នុងពេលដែលយើងអបអរការសំរេចបាននូវសមិទ្ធផលយ៉ាងត្រឹមត្រូវនេះ យើងក៏ត្រូវចងចាំ ផងដែរថា ទិវានារីអន្តរជាតិគឺជាឱកាសត្រូវធ្វើការអំពាវនាវជាថ្មី សុំអោយមានជាសកម្មភាពការវិនិយោគ និងការប្តេជ្ញាចិត្តចំពោះសមភាពសំរាប់ស្រ្តី។ យើងកំពុងឈានដល់ដំណាក់កាលជាប្រវត្តិសាស្រ្តមួយ។ លោកស្រីរដ្ឋមន្រ្តីការបរទេសសហរដ្ឋអាមេរិក Clinton បានហៅយុគសម័យនេះថាជា “យុគសម័យនៃការចូលរួម”។
នេះគឺជាពេលមួយដែលមនុស្សគ្រប់រូប ដោយមិនគិតពីភេទ ឬលក្ខណៈដទៃ ណាផ្សេងទៀត ត្រូវរៀបចំខ្លួនអោយទៅជាសមាជិកម្នាក់ដែលរួមចំណែក និងមានតំលៃសំរាប់សង្គម។
នៅជុំវិញពិភពលោក យើងមើលឃើញគំរូនៃយុគសម័យនៃការចូលរួម ដោយមានស្រ្តីបង្ហាញភាពក្លាហាន និងភាពជាអ្នកដឹកនាំពិសេសក្នុងការតស៊ូមតិ ដើម្បីសិទ្ធិ និងការផ្តល់អំណាចសំរាប់ស្រ្តី ដែលជាញឹកញាប់ ធ្វើអោយពួកគាត់ប្រឈមនឹងគ្រោះថ្នាក់យ៉ាងច្រើនដល់រូបពួកគាត់ផ្ទាល់។ នៅប្រទេសកម្ពុជា ស្ថានទូតអាមេរិកបានទទួលស្គាល់លោកស្រី ចាន់ ធារី ថាជា “ស្រ្តីក្លាហាន”ប្រចាំឆ្នាំ ២០១២ ។
ក្នុងនាមជានាយកប្រតិបត្តិនៃអង្គការសម្ព័ន្ធភាពដើម្បីសុខភាពកុមារ និងសុខភាពបន្តពូជ (RACHA) ដែលជាអង្គការដៃគូនៃកម្មវិធីរបស់ទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) នៅប្រទេសកម្ពុជា លោកស្រី ធារីបានធ្វើការសហការដោយមិនខ្លាចនឿយហត់ ជាមួយក្រសួងសុខាភិបាលកម្ពុជា និងដៃគូអភិវឌ្ឍន៍ដទៃទៀត ដើម្បីកាត់បន្ថយការស្លាប់របស់ម្តាយ ទារកទើបនឹងកើត និងកុមារនៅប្រទេសកម្ពុជា ក្នុងរយៈពេល ៨ ឆ្នាំមកនេះ។ ការរួមចំណែករបស់លោកស្រី ធារី ជួយអោយម្តាយនិងកុមារីកម្ពុជា អាចរស់នៅក្នុងនាមជាពលរដ្ឋដែលមានសុខភាពបរិបូរ និងមានភាពសកម្មនៅក្នុង សហគមន៍របស់គេ ដោយរួមចំណែកធ្វើអោយសង្គមខ្មែរកាន់តែមានវិបុលភាពច្រើនថែមទៀត។ រឿង របស់លោកស្រី ធារី គ្រាន់តែជារឿងមួយក្នុងចំណោមរឿងជាច្រើនរបស់មេដឹកនាំថ្មីៗ ដែលគេឃើញនៅ គ្រប់តំបន់នៃពិភពលោក។
ស្រ្តីគឺជាគ្រឹះនៃគោលនយោបាយការបរទេសអាមេរិក ដូចដែលត្រូវបានស្តែងអោយឃើញដោយ ផែនការសកម្មភាពជាតិជាលើកដំបូងបង្អស់របស់សហរដ្ឋអាមេរិក ស្តីពីស្រ្តី សន្តិភាព និងសន្តិសុខ ពីព្រោះថា គ្មានប្រទេសណាមួយអាចសង្ឃឹមថានឹងអាចបោះជំហានទៅមុខបានទេ ប្រសិនបើពាក់ កណ្តាលនៃប្រជាជនក្នុងប្រទេសនេះត្រូវបានគេទុកចោល។ ស្រ្តី និងកុមារីជំរុញសេដ្ឋកិច្ចរបស់យើង។ គេកសាងសន្តិភាពនិងវិបុលភាព។
ការវិនិយោគទៅលើពួកគេគឺជាការវិនិយោគដើម្បីភាពជឿនលឿននៃសេដ្ឋកិច្ចពិភពលោក ស្ថេរភាពនយោបាយ និងវិបុលភាពកាន់តែច្រើនសំរាប់មនុស្សគ្រប់គ្នា នៅទូទាំងសាកលលោក។ ក្នុងពេលដែលយើងផ្តល់កិត្តិយសដល់ពួកគេនៅថ្ងៃនេះ ចូរយើងប្តេជ្ញាសារជាថ្មីថា នឹង ធ្វើការដើម្បីបុព្វហេតុសមភាព នៅគ្រប់ពេលវេលាទាំងអស់។
- Share
- Delicious
- Digg
- StumbleUpon
