សុន្ទរកថា ក្នុងឆ្នាំ២០១២
- បកប្រែ:
- English
សុន្ទរកថារបស់លោកភារធារី Jeff Daigle ក្នុងពិធីសម្ពោធគម្រោងប្រឆាំងការជួញដូរមនុស្សជំហានទី២
សណ្ឋាគាររ៉ាហ្វឡឺរ៉ូយ៉ាល ក្រុងភ្នំពេញ | ថ្ងៃទី១៩ ខែមករា ឆ្នាំ២០១២
(រៀបចំសម្រាប់ថ្លែង)
ឯកឧត្តម ស ខេង ឧបនាយករដ្ឋមន្រ្តី ឯកឧត្តម អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ ឯកឧត្តម លោកជំទាវ ភ្ញៀវកិត្តិយស ដៃគូ លោក លោកស្រី អ្នកនាងកញ្ញាជាទីមេត្រី។
ថ្ងៃនេះខ្ញុំមានកិត្តិយសដែលបានមកចូលរួមសម្ពោធជាផ្លូវការនូវគម្រោងប្រឆាំងការជួញដូរមនុស្សជំហានទី២ ដែលគាំទ្រដោយរដ្ឋាភិបាលសហរដ្ឋអាមេរិក។ ខ្ញុំសូមថ្លែងអំណរគុណចំពោះឯកឧត្តម ស ខេង ចំពោះការបន្តការដឹកនាំ និងការប្តេជ្ញារបស់ឯកឧត្តមដើម្បីបពា្ឈប់ការជួញដូរមនុស្សនៅកម្ពុជា។ ខ្ញុំក៏សូមកោតសរសើរផងដែរចំពោះដៃគូដ៏សំខាន់របស់យើងគឺ លោកជំទាវ ជូ ប៊ុនអេង ប្រធានលេខាធិការដ្ឋានគណៈកម្មាធិកាជាតិ ដឹកនាំការប្រយុទ្ធប្រឆាំងអំពើជួញដូរមនុស្ស រត់ពន្ធមនុស្ស កេងប្រវ័ញ្ចកំលាំងពលកម្ម និងកេងប្រវ័ញ្ចផ្លូវភេទលើស្រ្តី និងកុមារ។ លោកជំទាវគឺជាសម្ព័ន្ធមិត្តដ៏ចំបងរបស់ យើងនៅក្នុងការប្រយុទ្ធប្រឆាំងនេះ។ សំរាប់អ្នកតំណាងមកពីអង្គការសង្គមស៊ីវិល អ្នកបានដើរតួនាទីយ៉ាងសំខាន់នៅក្នុងការបញ្ឍប់ការជួញដូរមនុស្ស និងការរើសអើង និងការឈឺចាប់ដែលកើតមានពីអំពើជួញដូរនេះ។ ខ្ញុំសូមថ្លែងអំណរគុណចំពោះការខិតខំរបស់លោក អ្នក។
ជាមួយគ្នានេះផងដែរ ខ្ញុំមានសេចក្តីរីករាយសូមស្វាគមន៍ដៃគូ អនុវត្តគម្រោងប្រឆាំងការជួញដូរមនុស្សថ្មីរបស់យើងគឺ អង្គការ Winrock International។ អង្គការ Winrock មានបទពិសោធន៍នៅក្នុងការធ្វើការងារដើម្បី បញ្ឍប់ការជួញដូរមនុស្ស និងជួយដល់ប្រជាជនដែលងាយរងគ្រោះនៅទូទាំងពិភពលោក។ រួមជាមួយក្រុមដែលដឹកនាំដោយជនជាតិកម្ពុជានិងរបៀបវារៈដ៏ធំ ខ្ញុំមានការរំពឹងទុកខ្ពស់លើកម្មវិធីនេះ។
នៅថ្ងៃទី៣០ ខែធ្នូ ប្រធានាធិបតីសហរដ្ឋអាមេរិក Barak Obama បាន ប្រកាសយកខែមករា ឆ្នាំ២០១២ ជាខែជាតិសំរាប់ទប់ស្កាត់ការជួញដូរមនុស្ស និងទាសភាព។ នៅក្នុងសេចក្តីថ្លែងការរបស់ប្រធានាធិបតិ Obama បានកត់សំគាល់ផងដែរថាជិត១៥០ឆ្នាំមុន លោកប្រធានាធិបតិ Abraham Lincoln បានចេញសេចក្តីប្រកាសដោះលែងតាមផ្លូវច្បាប់នូវទាសករអាមេរិក។
ទោះបីជាយ៉ាងណាក៏ដោយ សេចក្តីប្រកាសនេះមិនបានបញ្ឍប់ ទាសភាពនៅក្នុងសហរដ្ឋអាមេរិកទាំងស្រុងទេ ហើយក៏គ្មានប្រទេសណាផ្សេងទៀតបានទទួលជោគជ័យនៅក្នុងការបញ្ឍប់ឧក្រិដ្ឋកម្មនេះដែរ។ ថ្វីបើទាសភាពកើតមានឡើងរាប់ពាន់ឆ្នាំមកហើយក៏ដោយ ទាសភាពមានការវិវត្តន៍ទៅជាទាសភាពសម័យទំនើបដែលត្រូវបានគេស្គាល់ថាជាអំពើជួញដូរមនុស្ស។
បច្ចុប្បន្ននេះការជួញដូរមនុស្សកើតមានឡើងជាច្រើនទំរង់។ ជនរងគ្រោះ ត្រូវបានបង្ខំអោយធ្វើការនៅតាមផ្ទះ រោងចក្រ ទូកនេសាទ រឺនៅក្នុងទីវាលកសិដ្ឋានសំរាប់និយោជកដែលទុកពួកគេដូចជាអ្នកជាប់ក្នុងមន្ទីរឃុំឃាំង។ ជនរងគ្រោះមួយចំនួនត្រូវបានបង្ខំអោយបំរើផ្លូវភេទ ខណៈដែលមានអ្នកផ្សេងមួយ ចំនួនទៀតត្រូវបង្ខំអោយសុំទាននៅតាមដងវិថីនានា។ ជនរងគ្រោះជាច្រើន ត្រូវបានគេបោកបញ្ឆោត ខណៈដែលពួកគេកំពុងតែគិតថានឹងទទួលបាន ឳកាសការងារដ៏ស្របច្បាប់មួយ ប៉ុន្តែពួកគេបែរជាមកជាប់អន្ទាក់ និង មិនអាចចាកចេញផុតពីស្ថានភាពកេងប្រវ័ញ្ចទៅវិញ។ អ្នកខ្លះទៀតត្រូវបានគេទិញលក់ដូចរបស់។ ពួកគេគឺមានកុមារ ស្រ្តី និងបុរសគ្រប់វ័យ។ ភាគច្រើននៃពួកគេមិនអាចសុំអោយនរណាជួយបានទេ។
ខ្ញុំសូមកោតសរសើរចំពោះការខិតខំប្រឹងប្រែងរបស់រាជរដ្ឋាភិបាល កម្ពុជា និងលទ្ធផលដែលសំរេចបាននាពេលកន្លងមកនៅក្នុងការប្រយុទ្ធប្រឆាំង ការជួញដូរមនុស្ស និងការពារប្រជាពលរដ្ឋរបស់ខ្លួន។ ខ្ញុំសូមថ្លែងអំណរគុណ ដល់អង្គការ និងអស់លោក អ្នកទាំងអស់ដែលមានវត្តមាននៅទីនេះនាថ្ងៃនេះ ដែលរក្សាបាននូវឆន្ទៈបំបាត់ការជួញដូរមនុស្ស។
សូមបញ្ចប់ដោយធ្វើការបញ្ចាក់ជាថ្មីម្តងទៀតនូវពាក្យពេចន៍របស់ប្រធានាធិបតី Obama ។ ថ្ងៃនេះនៅក្នុងអំឡុងពេលនៃខែជាតិទប់ស្កាត់ការជួញដូរមនុស្ស និងទាសភាព យើងឈរជាមួយអស់លោក អ្នកទាំងអស់គ្នាដើម្បីដោះស្រាយបញ្ហាទាំងនេះ។ រដ្ឋាភិបាលសហរដ្ឋអាមេរិកទទួលស្គាល់អង្គការ ស្ថាប័នរដ្ឋាភិបាល និងប្រជាជនទាំងអស់ដែលបានធ្វើការងារ ដើម្បីប្រយុទ្ធប្រឆាំងការជួញដូរមនុស្ស។ យើងទាំងអស់គ្នាប្តេជ្ញាជាថ្មីក្នុងការបញ្ឈប់អំពើរំលោភសិទ្ធិមនុស្សធ្ងន់ធ្ងរនេះ នៅប្រទេសកម្ពុជា និងនៅកន្លែងដទៃ ជុំវិញពិភពលោក។
សូមអរគុណ។
- Share
- Delicious
- Digg
- StumbleUpon
