Informata të përgjithshme

Arsimi i lartë në Shtetet e Bashkuara është mjaft i shumëllojshëm dhe i decentralizuar. Ai karakterizohet me institucione konkurruente dhe autonome të arsimit të lartë. Momentalisht, në SHBA ekzistojnë rreth 4.180 kolegje dhe universitete. Prej këtyre, mbi 1.700 janë të ashtuquajtura “institucione dy-vjeçare” dhe 2.450 janë “institucione katër-vjeçare”. Përveç rreth 1.700 institucioneve publike (që udhëhiqen nga shtetet, qytetet apo rajonet në të cilat janë të vendosura), gjithashtu ekzistojnë mbi 2.480 kolegje dhe universitete private. “Kolegjet publike” përbëjnë të shumtën e institucioneve amerikane dy-vjeçare dhe janë mjaft praktik për studentët fillestarë që dëshirojnë të ndjekin kurse fillestare të gjuhës apo të përgjithshme. 

Momentalisht, në institucionet amerikane për arsim të lartë janë të regjistruar mbi 14 milion studentë, dhe shumica nga këta studentë – rreth 11 milion – studiojnë në universitete dhe kolegje shtetërore. 
Sipas Raportit të Institutit për arsim ndërkombëtar (IIE) për vitin 2007, numri i studentëve jo-amerikanë të regjistruar në institucionet amerikane për arsim të lartë gjatë vitit akademik 2006-2007 shënoi rritje për 3 përqind në gjithsej 582.984, dhe numri i regjistrimeve të reja u rrit në mënyrë drastike, e që ka të bëjë me shkëmbimin ndërkombëtar të nxënësve dhe studentëve.

“Rritja e regjistrimeve që shohim këtë vit në të dhënat statistikore të Dyerve të hapura, reflekton dinamikën,diverzitetin dhe përsoshmërinë e institucioneve amerikane për arsim të lartë në një ambient konkurrent ndërkombëtar, dhe demonstron përkushtimin e qeverisë së SHBA-ve dhe liderëve të arsimit të lartë në SHBA për të krijuar kushte ku studentët ndërkombëtar do të ndjehen të mirëseardhur,” tha nënsekretari i shtetit për diplomaci publike dhe marrëdhënie me publikun Karen Hughes në fjalimin e saj me rastin e publikimit të raportit Dyer të hapura 2007.

Shumica e universiteteve dhe kolegjeve amerikane kanë afate të shkurtra për regjistrim. Studentët potencial, univerziteteve amerikane duhet t’u shkruajnë një vit para datës kur planifikojnë të fillojnë studimet dhe para se të marrin formularët për aplikim. Shumë shkolla kanë afate më të gjata. Për të ndjekur një shkollë për gjuhë, të njëjtës duhet t’i shkruani së paku tre muaj para datës kur planifikoni të filloni mësimet tuaja.

Universitetet dhe kolegjet amerikane do të kërkojnë nga ju që të plotësoni formularët e tyre për aplikim dhe t’i dërgoni ato së bashku me pagësen për aplikim para skadimit të afatit të paraparë. Zakonisht, këto institucione kërkojnë që të dorëzoni transkriptën ku është dhënë nota juaj mesatare, referenca nga mësimdhënësit tuaj, rezultatet tuaja nga testi TOEFL, SAT, apo GRE ose GMAT. Nëse nuk zotëroni gjuhën angleze në mënyrë të shkëlqyer, nuk do të mund të kaloni këto teste.

Universitetet, kolegjet dhe shkollat amerikane të gjuhës kërkojnë pagesë për shkollim. Që të mund të studjoni në Amerikë, ju duhet të jeni në gjendje që të mbuloni shpenzimet për shkollim dhe qëndrim. Shpenzimet e përgjithshme (shkollim + qëndrimi) për një vit zakonisht arrijnë shumën nga $15.000 deri në $45.000, varësisht nga shkolla dhe rajoni ku ajo gjindet.

Në parim, studentët e huaj nuk lejohen të punojnë jashtë kampusit. Edhe nëse pas arritjes suaj në Amerikë keni marrë leje për punë, paga që ju mund të fitoni në kushtë normale nuk mund të mbulojë shpenzimet tuaja. Për këtë shkak, ju nuk duhet të mbështeteni në idenë që të financoni shkollimin tuaj duke punuar në Shtetet e Bashkuara. Përjashtim nga kjo janë rastet kur universiteti juaj u ofron mundësi për t’ju angazhuar si asistent. 

Që të fitoni ndihmë financiare apo të angazhoheni si asistent nga një universitet apo kolegj amerikan, ju duhet të keni nota dhe njohuri të shkëlqyeshme të gjuhës angleze, duhet të jeni një nga studentët më të mirë në shkollën apo departamentin tuaj, duhet të arrini rezultate të larta në teste dhe të keni referenca shumë të mira nga mësimdhënësit tuaj.

Për më tepër informata në lidhje me shkollimin në SHBA dhe bursat Fulbright, vizitoni:

• Dorracakun e Stejt Departamentit për arsim të lartë
• Programe të Stejt Departamentit për shkëmbim të nxënësve dhe studentëve 
• Instituti për arsim ndërkombëtar 
• Programi arsimor Fulbright 
• Konkursi ndërkombëtar Fulbright për shkencë dhe teknologji për studentë të dalluar (Fulbright S&T)
• Programi Hubert H. Humphrey 
• Institute të Shteteve të Bashkuara për studime për specialistë 
• Këshillat amerikanë për arsim ndërkombëtar 
• Instituti transatlantik veror Benjamin Franklin