ទិដ្ឋាការអន្ដោប្រវេសន៍
សេចក្តីណែនាំស្តីពីការធ្វើតេស្តន៍ DNA
មន្ត្រីកុងស៊ុលបានផ្តល់យោបល់ឲ្យលោកអ្នកប្រើការធ្វើតេស្តន៍ DNA ដើម្បីបញ្ជាក់ថាលោកអ្នកគឺពិតជាសាច់ញាតិបង្កើត។ ការធ្វើតេស្តន៍ DNA គឺជាការវិភាគហ្សែននៅក្នុងកោសិការរបស់មនុស្ស ដោយការផ្តិតយកទឹកមាត់បន្តិចបន្តួច ហើយការធ្វើតេស្តន៍នេះមានភាពត្រឹមត្រូវលើសពី ៩៩% ក្នុងការបញ្ជាក់អំពីសាច់ញាតិសណ្តាន។ ការប្រើប្រាស់ការធ្វើតេស្តន៍ DNA ដើម្បីបញ្ជាក់ គឺជាការស្ម័គ្រចិត្តរបស់បេក្ខជននិងអ្នកធានា ហើយរាល់ការចំណាយក៏ជាបន្ទុករបស់បេក្ខជននិងអ្នកធានាដែរ។ ប្រសិនបើអ្នកស្ម័គ្រចិត្តប្រើប្រាស់ការធ្វើតេស្តន៍ DNA សូមលោកអ្នកធ្វើដូចខាងក្រោម៖
អ្នកធានាត្រូវជ្រើសរើសមន្ទីរពិសោធន៍ណាមួយពីក្នុងបញ្ជីមន្ទីរពិសោធន៍ដែលបានទទួលស្គាល់ដោយសមាគមន៍មន្ទីរឈាមសហរដ្ឋអាមេរិក (AABB) ។ មន្ទីរពិសោធន៍ដែលត្រូវជ្រើសរើសត្រូវតែមានលក្ខណៈដូចខាងក្រោម៖
- អាចធ្វើតេស្តន៍ ដោយប្រើឧបករណ៍យកទឹកមាត់ (ឈាមនឹងមិនត្រូវយកមកប្រើប្រាស់ទេ)។
- មានលទ្ធភាពធ្វើតេស្តន៍ដើម្បីបញ្ជាក់ប្រភេទញាតិសណ្តានផ្សេងៗតាមការស្នើសុំ ព្រោះមិនមែនគ្រប់ការស្នើ សុទ្ធតែដើម្បីបញ្ជាក់ពីឪពុកមា្តយ និងកូនបង្កើតទេ។
- ប្រើប្រាស់ក្រុមហ៊ុន Fedex ជាភ្នាក់ងារផ្ញើឧបករណ៍ទាំងទៅនិងមក រវាងកម្ពុជានិងអាមេរិក។
- បង់ប្រាក់ឲ្យក្រុមហ៊ុន Fedex ជាមុន សំរាប់ការផ្ញើឧបករណ៍ទាំងទៅនិងមក មុនពេលផ្ញើមកកាន់ស្ថានទូត ។
បន្ទាប់ពីរើសបានមន្ទីរពិសោធន៍ ដែលមានលក្ខណៈដូចខាងលើ អ្នកធានាត្រូវទាក់ទងមន្ទីរពិសោធន៍ ដោយឲ្យមន្ទីរពិសោធន៍ផ្ញើឧបករណ៍យកគំរូ DNA មកកាន់ស្ថានទូតតាមអាស័យដ្ឋាន៖ ស្ថានកុងស៊ុលសហរដ្ឋអាមេរិក ផ្នែកទិដ្ឋាការអន្តោប្រវេសន៍ អាគាលេខ១ ផ្លូវលេខ ៩៦ សង្កាត់វត្តភ្នំ ខណ្ឌដូនពេញ ព្រះរាជាណាចក្រកម្ពុជា។
បន្ទាប់ពីស្ថានទូតបានទទួលឧបករណ៍ និងបានកំណត់នូវថ្ងៃសំរាប់ធើ្វតេស្តន៍រួមមួយ យើងខ្ញុំនឹងទូរស័ព្ទប្រាប់បេក្ខជន អំពីកាលបរិចេ្ឆទ ដែលនឹងត្រូវធើ្វតេស្តន៍ នៅស្ថានកុងស៊ុលនៃស្ថានទូតសហរដ្ឋអាមេរិក។ មន្ទីរពេទ្យ IOM ឬ SOS នឹងរួមសហការណ៍ក្នុងការយកគំរូ DNA នៅថ្ងៃនោះ។
បេក្ខជនត្រូវធ្វើដូចខាងក្រោម សំរាប់ការធ្វើតេស្តន៍ បន្ទាប់ពីបានទទួលទូរស័ព្ទពីស្ថានទូត៖
១) មុនថ្ងៃមកធ្វើតេស្តន៍មួយថ្ងៃ៖ បេក្ខជនត្រូវទៅបង់ប្រាក់ នៅមន្ទីរពេទ្យដែលស្ថានទូតបានកំណត់ណាមួយ៖
- មន្ទីរពេទ្យ IOM នឹងយកតំលៃ ២៥ ដុល្លាអាមេរិកក្នុងម្នាក់។ លេខទូរស័ព្ទមន្ទីរពេទ្យ៖ (០២៣) ៧២០ ៤០៦ / ២១៦ ៥៣២
- មន្ទីរពេទ្យ SOS នឹងយកតំលៃ ២៧ ដុល្លាអាមេរិកក្នុងម្នាក់។ លេខទូរស័ព្ទមន្ទីរពេទ្យ៖ (០២៣) ២១៦ ៩១១
២) នៅថ្ងៃធ្វើតេស្តន៍នៅស្ថានទូត៖ បេក្ខជនម្នាក់ៗត្រូវយកមកជាមួយនូវ៖
- រូបថត ទំហំ ៥x៥ ស.ម. ដែលមានផ្ទៃក្រោយពណ៌ស ចំនួន ២ សន្លឹក ហើយគ្មានសរសេរអ្វីនៅខាងខ្នង។
- លិខិតឆ្លងដែនឬអត្តសញ្ញាណប័ណ្ណ ដែលនៅមានសុពលភាពប្រើប្រាស់។ សំរាប់បេក្ខជនសុំលិខិតឆ្លងដែននិងសញ្ជាតិអាមេរិក (CRBA) ត្រូវយកមកជាមួយនូវសំបុត្រកំណើតច្បាប់ដើមនិងបកប្រែ។
- បេក្ខជនដែលមានអាយុក្រោម ១៨ ឆ្នាំ ត្រូវតែមានអាណាព្យាបាលមកជាមួយ ហើយអាណាព្យាបាលនោះត្រូវយកមកជាមួយ នូវលិខិតឆ្លងដែន ឬអត្តសញ្ញាណប័ណ្ណដែរ។
- លោកអ្នកអាចពិសារអាហារបាន ប៉ុន្តែសូមសំអាតមាត់ក្រោយពេលបរិភោគ។ ការធ្វើតេស្តន៍ត្រូវចំណាយពេលកន្លះថ្ងៃ។
សូមបញ្ជាក់ថា បេក្ខជនដែលមិនបានបំពេញត្រឹមត្រូវនូវលក្ខខណ្ឌខាងលើ នឹងត្រូវបានលើកថ្ងៃធ្វើតេស្តន៍ទៅថ្ងៃក្រោយ ទោះបីជាបានបង់ប្រាក់ឲ្យមន្ទីរពេទ្យហើយក្តី។
ក្រោយពីការយកគំរូ DNA ស្ថានទូតនឹងផ្ញើគំរូនោះទៅមន្ទីរពិសោធន៍ ដែលនៅអាមេរិកវិញ ដើម្បីធ្វើការវិភាគ។
សំគាល់៖ មន្ទីរពិសោធន៍ត្រូវផ្ញើលទ្ធផល DNA ដែលមានភ្ជាប់មកជាមួយនូវឯកសារសំគាល់អត្តសញ្ញាណបេក្ខជន ដែលបានធ្វើតេស្តន៍ មកស្ថានទូតតាមអាស័យដ្ឋានដូចខាងលើដោយផ្ទាល់។ ស្ថានទូតមិនទទួលស្គាល់លទ្ធផលទាំងឡាយណាដែលបេក្ខជនកាន់មកទេ។
លោកអ្នកមិនគួរធ្វើតេស្តន៍ DNA ដោយគ្មានការស្នើសុំពីមន្រ្តីកុងស៊ុលទេ ព្រោះយើងមិនទទួលស្គាល់ការធ្វើតេស្តន៍ណាដែលគ្មានការសហការណ៍ពីស្ថានទូតឡើយ។ រាល់សំនួរទាក់ទងនិងការធ្វើតេស្តន៍ DNA សូមផ្ញើ Email មក៖ PHPDNA@state.gov ៕
