សេចក្តីប្រកាសពត៌មាន ក្នុងឆ្នាំ២០១៣
- បកប្រែ:
- English
ស្ថានទូតសហរដ្ឋអាមេរិក ប្រកាសទទួលសំណើសុំថវិកាពីមូលនិធិឯកអគ្គរដ្ឋទូត សំរាប់ការអភិរក្សវប្បធម៌ ឆ្នាំ២០១៣ ក្នុងកម្មវិធីជំនួយថវិកាខ្នាតធំ
ចេញថ្ងៃទី១៨ ខែមករា ឆ្នាំ២០១៣
ស្ថានទូតសហរដ្ឋអាមេរិកនៅទីក្រុងភ្នំពេញ និងការិយាល័យកិច្ចការអប់រំនិងវប្បធម៌ របស់ក្រសួងការបរទេសសហរដ្ឋអាមេរិក មានសេចក្តីរីករាយ សូមប្រកាសទទួលសំណើសុំថវិកាពីមូលនិធិឯកអគ្គរដ្ឋទូត សំរាប់ការអភិរក្សវប្បធម៌ (AFCP) ក្នុងកម្មវិធីជំនួយថវិកាខ្នាតធំ។
មូលនិធិ AFCP ត្រូវបានបង្កើតឡើង ដើម្បីជួយក្នុងការអភិរក្សទីតាំងបេតិកភណ្ឌវប្បធម៌។ គំរោងដែលត្រូវបានជ្រើសរើស សំរាប់ទទួលបានថវិកាក្រោមកម្មវិធីនេះ នឹងជំរុញគោលដៅការទូតរបស់សហរដ្ឋអាមេរិក ហើយបង្ហាញពីការគោរពដ៏ជ្រាលជ្រៅ របស់សហរដ្ឋអាមេរិក ចំពោះបេតិកភណ្ឌវប្បធម៌នៃប្រទេសកម្ពុជា។ មូលនិធិនេះមានបំណងអភិរក្សទីតាំងបូរាណសំខាន់ៗ អាគារនិងប្រសាទជាប្រវត្តិសាស្រ្ត និងវត្ថុសំរាប់រក្សាទុកក្នុងសារមន្ទីរ ដែលមានអត្ថន័យសំខាន់ ដល់បេតិកភណ្ឌវប្បធម៌នៃប្រទេសកម្ពុជា។ តាំងពីឆ្នាំ ២០០៨ មក អំណោយសំរាប់គំរោងធំថ្មីៗ ក្រោមកម្មវិធីនេះមានទឹកប្រាក់ក្នុងចំនួនពី ៥៧៥ ០០០ ដុល្លាអាមេរិកទៅ ៩៧៩ ០០០ ដុល្លាអាមេរិក ដោយគិតជាមធ្យមមាន ៧១២ ០០០ ដុល្លាអាមេរិក។
ដំណើរការដាក់ពាក្យសុំមាន ២ ដំណាក់កាល។ សូមចំណាំកាលបរិច្ឆេទនៃការដាក់ពាក្យសុំ ដែលមានដូចខាងក្រោមនេះ៖
- ថ្ងៃទី៦ ខែកុម្ភៈ ឆ្នាំ២០១៣ វេលាម៉ោង ៥ រសៀល គឺជាពេលចុងក្រោយសំរាប់ការផ្ញើសេចក្តីរៀបរាប់សង្ខេបស្តីពីគំរោង មកស្ថានទូតអាមេរិក (ដំណាក់កាលទី១) និង
- ថ្ងៃទី២១ ខែមិនា ឆ្នាំ២០១៣ វេលាម៉ោង ៥ រសៀល គឺជាពេលចុងក្រោយ សំរាប់ការផ្ញើសំណើសុំគំរោងទាំងមូល មកស្ថានទូតអាមេរិក ចំពោះសេចក្តីរៀបរាប់សង្ខេបនៃគំរោង ដែលបានទទួលការយល់ព្រម ក្នុងដំណាក់កាល១។
ចំពោះព័ត៌មានស្តីពីការដាក់សំណើសុំ និងដើម្បីមើលគោលការណ៍ស្តីពីការដាក់ពាក្យសុំថវិកាពីកម្មវិធីនេះ សូមចុចត្រង់នេះ។
