Mua pea le viiga ma le fa’amanu i lo tatou Tama i le lagi ona o Lana pule fa’a-soifua ua tatou ‘oa’oa ai nei i faleseu ma sa’a i ma’omalie i le lagimama ma le soifua maua i le mamalu ‘ese’ese o Samoa aemaise le ‘au vala’aulia.

     Nu’unu’u atu ia ou pa’ia Samoa i le au Tulatoa ma le au Fueloloa o lo’o outou tausi va’atele i paia o le tatou atunu’u.  Ae o le aso lenei sa taupoina aua le fa’apa’iaina o tofiga e pei ona liliu ai le tofa a Amerika Samoa i lau Afioga a le Kovana Sili Tauese Pita Sunia fa’apea le Kovana Lutena le Matua o Togiola Talalelei Tulafono e toe ta’ita’iina le tatou Malo mo le isi fa tausaga oi luma.

     Tauese ma Togiola, malo finau, malo fo’i le fa’a-tupu ma le fa’a-tamali’i.  Ia iai pea le fa’amanuiaga silisili a le Atua i lau Afioga le Kovana Sili fa’apea lau Susuga le Kovana Lutena ma o oulua faletua i le soifua maloloina.  Ia fa’apea fo’i ona fa’amanuia atu le Atua i le poto ma le fa’autauta aua le ta’ita’iina o le tatou Malo.

     E le mafai fo’i ona fa’agaloina i le loto lau Afioga a le Tapa’aufa’asisina, lau Susuga a le Malietoa Tanumafili II, le Ao Mamalu o le Malo o Samoa.  Ia manuia lava le fa’amanatuina o lou aso soifua – ia alofa le Atua ma foa’i atu pea lou soifua laulelei ma saga fa’ateleina ni aso fiafia fa’apenei i le lumana’i.

     E fa’apea fo’i lau Afioga a Taufa’ahau Tupou IV, le Tupu o le Malo o Toga.  Ia maua pea e lau Afioga fa’amanuiaga silisili mai i le Atua.

     Soifua.