|
حامد کرزئی |
افغان صدر حامد کرزئی نے 20اگست کو ہونے والے صدارتی انتخاب کے لیے پیر کے روز اپنے کاغذات نامزدگی جمع کرادیے ہیں۔ 2004ء میں افغانستان کے صدر منتخب ہونے والے حامد کرزئی دوسری مدت کے لیے انتخاب میں حصہ لے رہے ہیں۔ انھوں نے موجودہ نائب صدر کریم خلیلی اور سابق نائب صدر محمد قاسم فہیم کو نائب صدور کے لیے نامزد کیا ہے اور ان کے کاغذات بھی جمع کروائے۔ صدر کرزئی نے اس موقع پر اعتراف کرتے ہوئے کہا کہ ماضی میں ان سے کچھ غلطیاں ہوئی ہیں لیکن وہ دوبارہ افغان عوام کی خدمت کے لیے عہدہ صدارت کے امیدوار ہیں۔
حامد کرزئی کا تعلق افغانستان کے اکثریتی پشتون قبیلے سے ہے جب کہ ان کے نامزد کردہ نائب صدور میں سے قاسم فہیم تاجک اور کریم خلیلی کا تعلق ہزارہ قبائل سے ہے۔ان کے مد مقابل صوبہ ننگرہار کے گورنر گل آغا شیرازی نے گزشتہ ہفتے اپنے کاغذات واپس لے لیے تھے جبکہ سابق وزیر خارجہ ڈاکٹر عبداللہ بھی صدارتی انتخاب میں حصہ لینے کاعندیہ دے چکے ہیں تاہم انھوں نے ابھی تک کاغذات نامزدگی جمع نہیں کرائے۔
مبصرین کا کہنا ہے کہ حالیہ چند برسوں میں افغانستان میں تعینات اتحادی افواج کے حملوں میں بڑے پیمانے پر شہریوں کی ہلاکتوں اور حکومت پر بدعنوانی کے الزامات کے باعث صدر حامد کرزئی کی ساکھ بہت متاثر ہوئی ہے۔