Parlamana Herêma Kurdistana

Zana Rustayî endamê Parlamana Herêma Kurdistana Iraqê û endamê rêberîya Komeleya Îslamî dinav hevpeyvînekê de bo Pişka Kurdîya Dengê Amerîka li ser hilbijartinên bihêt yên Herêmê axift.

Çar hizbên Kurdistanê gihîştine yekûdu ku hevpeymanîyek dirust bikin bo hilbijartinên bihêt yên Herêma Kurdistana Iraqê ku dê li roja 25ê meha heft bêne kirin. Rêzdar Rustayî bo dirust kirina vê hevpeymanîyê dibêje danana bingeha vê hevpeymanîyê berî vê bi du salan bûye jiber pêdivîya gelê H. Kurdistanê bi guhorînekê dinav karûbar û revebirina sîyasî de ku gazin ji gendelî, nebûna dadperwerî û hesab kirin bo alîyên siyasî. Herwisa dibêje û pêkînana lîsteke hevbeş bo vê hilbijartinê yek ji bernameyên vê hevpeymanîyê bûye.

Bo belav kirina kursîyan paş hilbijartinê rêzdar Rustayî dibêje heke em bala xwe bidin hilbijartinên sala 2005, Hizba Zehmetkêşan dikaribû bi lîsteke serbixwe neh kursî bi destve bînin, Komela Îslamî bi lîsteke serbixwe karibûye şeş kursî bidestve bîne, Yekgirtî Îslamî ku linav lîsta Niştimana Demokrasî bû neh kursîyan bidestve anîbû û Hizba Soşyalîsta Demokrat du kursî bidestve anîbû. Dibêje bi endazyarîya li ser vê nêrînê û li dû guhorînên linav çar salên buhurî de ew gehêştine rêkeftinekê.

Hevkar B. Salih di hevpeyvînê de ji rêzdar Rustayî pirsî ka gelo çewa du alîyên îlmanî anku sekuler û du alîyên Îslamî di vê hevpeymanîyê de hatine cem hev. Zana Rustayî dibêje her partî di îdeolojî û baweriya xwe de azadin belê karên wek elektrîk, av, rêvebirina sistema siyasî, bicîh anîna qanun û sistema dadwerî qet pêdivî pê nîne ha ti îlmanî bî ha ti îslamî bî, ev berjewendîyên giştî yên xelkin.

Gelî guhdarên hêja heke bixwazin guh bidine dirêjahîya vê hevpeyvînê ji kerema xwe re li ser rûpela me ya Audioyên Kurdî îro linav Nûçeyên Rojane li bernama 1ê nîvêşevê guhdarî bikin.