Prezidan Barack Obama Renmen Pwogrè Lèzetazini Fè Pandan 100 Premye Jou Li sou Pouvwa a, men li "Pa Satisfè"
By Lyonel Desmarattes Washington, DC 30-04-2009
Prezidan Barack Obama
Prezidan ameriken an, Barack
Obama, make 100 premye jou li sou pouvwa yè mèkredi a, avèk yon seri de apèl li
lanse pou l mande diferan sektè nan vi nasyonal la o Zetazini pote apui yo bay
politik gouvènman n nan. Misye Obama lanse apèl sa yo nan 3èm. konferans pou laprès
li bay depi li te monte sou pouwva nan dat 20 janvye 2009 la. Lidè ameriken an di -nap
site : «Mwen fyè de sa nou reyalize, men mwen pa kontan. Mwen renmen pwogrè nou fè yo, men mwen pa satisfè."
Nan konferans pou laprès la,
Prezidan Obama di youn nan pi gwo sipriz li depi l te monte sou pouvwa a, se
gwo kantite pwoblèm gouvènman n nan vin gen devan n tou denkou e ki parèt an
menm tan. Pa egzanp, obligasyon adminitrasyon
an genyen pou l fè fas ak fenomèn grip pòsin nan. Prezidan an pale pou l di : "Nou
pral kontinye swiv de prè evolisyon viris H1N1 ki bay grip la, nap kontinye
swiv li a trè tout Lèzetazini."
Misye Obama pale klè pou l
di li pa genyen okenn plan pou l ta fèmen fwontyè Lèzetazini ak Meksikla. Daprè
li, si fenomèn grip pòsin nan bay rezon vrèman pou moun gen kè-sote, li pa bay
rezon pou moun panike.
« Sa k esansyèl la kounyela a », daprè lidè
ameriken an, « se pou n asire nou ke nap pran dispozisyon pou n rete
vijian. »
Sou plan politik entènasyonal la, misye Obama pale de sitiyasyon an nan
peyi Pakistan ; li fè konnen gouvènman ki nan Islamabad la, se yon
gouvènman frajil, men li gen konfyans ke asnal nikleyè peyi a pral kontinye gen
sekirite ki nesesè pou l pa tonbe anba men teworis.
« Mwen panse sa paske, tou dabò e sitou lame peyi Pakistan an byen
konnen ki danje ki genyen si zam sa yo ta tonbe nan men moun pou yo pa tonbe. »
Daklarasyon Prezidan Obama ki pale tou de monte vyolans moun konstate depi
kèk jou deja nan Irak. Men, li ensiste pou l di plan li genyen pou l wete sòlda
ameriken yo nan peyi sa a, pa chanje.
Si w ta renmen koute yon vèsyon odyo repòtaj sa a e plis ke sa toujou,
klike sou lyen ki anlè a, adwat.