اس مضمون میں ہم آپ کو چار ایسی ویب سائٹس کے بارے میں معلومات فراہم کررہے ہیں جہاں طالب علم امریکہ میں اعلیٰ تعلیم کے بارے میں راہنمائی حاصل کرسکتے ہیں۔
Cappex.com وہ ویب سائٹ ہے جہاں طالب علموں کو یہ بتایا جاتا ہے کہ ان کے لیے کون کون سے تعلیمی ادارے موزوں ہیں۔ طالب علم اپنے بارے میں اور اپنی دلچسپیوں کے بارے میں ایک خاکہ تیار کرسکتے ہیں۔ یہ ویب سائٹ دس سے بیس تعلیمی اداروں کے بارے میں تجویز دیتی ہے۔
لیکن Cappex کے صدر کرس لانگ کہتے ہیں کہ داخلے کی کوئی ضمانت نہیں ہوتی۔ یہ ویب سائٹ طالب علموں کے لیے مفت ہے۔ Cappex اس سائٹ پر سکولوں اور کمپنیوں کے لیے اشتہار دیتی ہے۔ایک اور ویب سائٹ CollegeClickTV.com ہے جہاں30 ہزار سے زیادہ ویڈیوز پر طالب علم اپنے تعلیمی اداروں کے بارے میں سوالوں کے جواب دیتے ہیں۔
CollegeClickTV کو ریکارڈنگ کے لیے کیمپس آنے کے لیے ادارے معاوضہ ادا کرتے ہیں۔ لیکن اس ویب سائٹ بانی اور صدر گلین پیرے کہتے ہیں کہ تعلیمی ادارے اس ویب سائٹ پر دی جائے معلومات کی نہ تو منظوری دیتےہیں اور نہ ہی اسے مسترد کرتے ہیں۔اس کا یہ مطلب نہیں ہے کہ طالب علم جوکچھ کہیں وہ سب کچھ اس ویب سائٹ پردے دیا جاتا ہے۔ ان کا کہنا ہے کہ طالب علموں کے لیے یہ لازمی ہوتا ہے کہ وہ جو کچھ بھی کہیں اس کی وہ معقول وجوہات بیان کریں۔
طالب علموں کے لیے ایک اور ویب سائٹ Zinch.com ہے جس میں طالب علم خود اپنے بارے میں معلومات کی ویڈیوز بناتے ہیں۔ اس ویب سائٹ کے شریک بانی سڈ کرومین ہویک کہتے ہیں کہ یہ ایک ایسی ویب سائٹ ہے جہاں طالب علم اپنی صلاحیتوں اور ٹیلنٹ کے بارے میں معلومات فراہم کرسکتے ہیں۔کمپنی کا کہنا ہے کہ طالب علموں کی تلاش کے لیے اس ویب سائٹ کے استعمال کی غرض سے چھ ہزار سے زیادہ کالج معاوضہ دیتے ہیں۔اس ویب سائٹ پر پانچ لاکھ سے زیادہ اسکول کے طالب علموں کے معلوماتی خاکے موجود ہیں۔
اور طالب علموں کے لیے اور ویب سائٹ کا نام ہےUnigo.com۔ اس ویب سائٹ پر کالجوں کےبارے میں جائزے، ویڈیوز اور دوسرے مضامین ہوتے ہیں جنہیں طالب علم پیش کرتے ہیں۔ ویب سائٹ پر موجود فیچرز میں تعلیمی اداروں کے غیر سرکاری دورے اور کساد بازاری سے نمٹنے کے بارے میں مشورے اور بلاشبہ کیمپس میں ڈیٹنگ پر بھی بات ہوتی ہے۔
طالب علموں کے لیے یہ مفت ویب سائٹ اشہتاروں پر چلتی ہے اور اس میں کل وقتی ایڈیٹرز کی ایک ٹیم کام کرتی ہے۔ یہ ویب سائٹ گذشتہ ستمبر میں ایک کمپنی نے قائم کی تھی جس کے سربراہ ایک26 سالہ نوجوان جورڈن گولڈ مین ہیں۔ ان کا کہنا ہے کہ اس ویب سائٹ کو امریکہ کے 250 کالجوں کے بارے میں معلومات سے شروع کیا جارہاہے اور ان میں مزید اضافہ کیا جائے گا۔
Unigo, Zinch, CollegeClickTV اور Cappex ویب پر کالجوں کی تلاش سے متعلق صرف کچھ ویب سائٹس ہیں۔ دوسری ویب سائٹس میں CheckMyCampus،MyCollegeOptions اور PrincetonReviewشامل ہیں۔