|
’تارے زمین پر‘ آسکر کی دوڑ سے باہر
|
ہما ہارون
ممبئی
January 14, 2009
|
|
اگرچہ گجنی کی ریکارڈ توڑ کامیابی سے عامر خان اِن دنوں پھولے نہیں سما رہے، لیکن آسکر کی دوڑ سے فلم تارے زمیں پر کے باہر ہونے کی خبر نے عامر اور کروڑوں بھارتیوں کی خوشیوں کو ماند کردیا ہے ۔
بھارت کی جانب سے اِس سال عامر کی فلم تارے زمیں پر کو آسکر کے لیے نامزد کیا گیا تھا ۔ یہ فلم اداکار عامر خان کی بہ حیثیت ہدایت کار پہلی فلم ہے۔ بالی وڈ، سنیمابین اور فلم ناقدین سبھی پرامید تھے کہ جس طرح ’ تارے زمیں پر‘ نے قومی سطح پر تقریبا تمام ایوارڈز جیتےاُسی طرح آسکر ایوارڈز کے لیے بھی یہ فلم عامر کے لیے لکی ثابت ہوگی پر ایسا ہو نہ سکا ۔
اِس سے قبل 2002ء میں بھی عامر خان ہی کی فلم لگان کو بھارت کی جانب سے آسکر کے لیے نامزد کیا گیا تھا ۔ فلم لگان تو آسکر ایورڈز کےغیر ملکی ذبان کے زمرے کی فائنل پانچ فلموں میں بھی جگہ حاصل کرنے میں کامیاب ہوئی تھی ۔ تاہم بازی’ نو مینز لینڈ‘ نامی فلم لے گئی تھی۔
اُس کے بعد 2006ء میں عامر کی فلم رنگ دے بسنتی کو بھارت کی جانب سے آسکر کے لیے نامزد کیا گیا ۔ راکیش میہرا کی ہدایت کاری میں بنی اِس فلم نے بھلے ہی بالی وڈ میں ایک نیا انقلاب برپا کیا ہو، تاہم رنگ دے بسنتی آسکر کی دوڑ کے پہلے مرحلے میں پہچنے سے قبل ہی باہر ہو گئی ۔ اور اب تیسری بار بھی قسمت نے عامر کاساتھ نہیں دیا ۔
عامر کی فلم تارے زمیں پر آسکر کے لیے نامزد ہونے والی نو بہترین فلموں میں شامل نہیں ہو پائی ہو پر یہ فلم اپنی منفرد کہانی کے لیے بھارتی فلموں کی تاریخ میں ہمیشہ یاد رکھی جائے گی ۔ فلم میں آٹھ سالہ چائلڈ آرٹسٹ درشیل سفاری نے غضب کی اداکاری کی ہے ۔ فلم تارے زمیں پر میں درشیل نے ایشان نامی بچے کا رول کیا ہے جو پڑھائی میں تو کمزور ہے لیکن ڈرائنگ میں نمبر ون ۔فلم میں عامر نے ایک ایسے استاد کا کردار نبھایا ہے جو کتابی دنیا سے ہٹ کر نئی طریقوں کو اپنا کر ننھے بچوں کو تعلیم دینے کو فروغ دیتا ہے۔
اسرئیل کی فلم والٹز وِد بشیر، فرانسیسی فلم دی کلاس، ترکی کی فلم ’تھری منکیز‘، سویڈن کی فلم ’ایور لاسٹنگ مومینٹس‘، میکسیکو کی فلم’ ٹیئر دس ہارٹ آؤٹ‘ جیسی نو فلمیں غیر ملکی زبان کے ذمرے میں اِس سال آسکر ایوارڈ کی دوڑ میں شامل ہیں ۔ آسکر ایوارڈ کا اعلان 22 فرروی کو کیا جائے گا۔
|
|
|