Umhlangano wecele leMDC elikhokhelwa nguMnu Morgan Tsvangirai oweStanding Committee, wona oqale eSouth Africa ngolweSibili uphele lamuhla lapho uMnu Tsvangirai leziphathamandla zebandla lakhe abakhulumisane ngodaba lokuthi baqhubekele phambili njani kudaba lokubunjwa kukahulumende womanyano.

Abazi okwenzakala kuleli bandla bathi umhlangano lo unqume ukuthi iNational Executive yalelibandla ibe lomhlangano mhlaka 18 kuyonale inyanga iphume lesinqumo phezu kodaba lokuthi liphume kunkulumo zokubunjwa kukahulumende womanyano umbe hatshi. Kubikwa njalo leli bandla lizaqhuba umhlangano walo weNational Conference ekupheleni kuka Mbimbitho. 

Laloba icele likaTsvangirai lilandula ukuthi like laqhuba umhlangano eMzansi Africa, abasiki bebunda bathi uTsvangirai labanye bakhe bakhulumisane njalo ngodaba lokuthi bazathatha manyathelo bani nxa uMongameli Mugabe engathi kwenziwe ukhetho olutsha --- kumbe engabumba idale lecabinet elingela MDC phakathi.

Bathi njalo uTsvangirai, yena oselenyanga phose ezintathu engekho elizweni, ulakho ukuphindela ekhaya ngempelaviki. Umhlangano weStanding Committee lo ubikwa usekele isinqumo sikaTsvangirai esokuthi ibandla lakhe kalisoze lingene kuhulumende womanyano lo leZanu PF izikhalazo zalo zingalungisiswanga. 

Kodwa isinqumo esisemthethweni sizaphuma emhlanganweni weNational Executive mhlaka 18, kutsho abasiki bebunda. Isikhulumi salelicele uMnu Nelson Chamisa ulandule ukuthi babe lomhlangano eMzansi, kodwa uthi ingamanga imbiko yokuthi ibandla lakhe lidabukene phakathi phezu kodaba lokungena kumbe ukungangeni kuhulumende womanyano. 

UNtungamili Nkomo weStudio 7 uxhume ingcwethi ecubungula ezombusazwe uMnu Mlamuli Nkomo ukuhlaziya lolu daba.

Ezinye indaba zeStudio 7...