Azərbaycan
hökumətinin xarici radioların yerli dalğada yayımının dayandırılması barədə qərarı
ölkənin beynəlxalq nüfuzuna xələl gətirdi. Bunu Freedom House təşkilatının araşdırmalar
direktoru Kristofer Volker Amerikanın səsinə müsahibəsində
qurumun 2008-ci ildə dünyada insan azadlıqlarının vəziyyəti barədə yaydığı
hesabatın Azərbaycanla bağlı hissəsini şərh edərkən deyib.
Kristofer Volker
Cənab Volker
fikrini belə davam etdirib: "Bu qərar ölkə
ilə bağlı bir çox ümidləri də puça çıxardı. Əslində biz hesabatımızda yalnız hadisələrin
xülasəsinə əsaslanmırıq, ancaq bu il Bakıdan gələn xəbərlər olduqca qaranlıq mənzərə yaradır. Əvvəl referendum məsələri,
sonra radiolarla bağlı qərar... Məncə, bütün bu hadisələr arasında bir bağlılıq
var. Belə ki, bütün bunlar ölkədəki siyasi sistemi və siyasətçiləri adi insanlar
qarşısında cavabdehlikdən uzaqlaşdırmağa hesablanıb".
Bu ilki hesabatda mübahisə doğuracaq məsələlərdən
biri də sənədə ayrıca bənd qismində, münaqişəli ərazilərin daxil edilməsidir. Hesabat
müəllifləri Azərbaycanı qeyri-azad ölkə hesab etdikləri halda, onun Dağlıq
Qarabağ ərazisini "qismən azad" kimi göstəriblər. Halbuki, bu
siyahıya daxil olunmuş münaqişəli ərazilərin əksəriyyəti azad olmayan statusa
malikdirlər.
Cənab Volker Dağlıq Qarabağla Azərbaycanın digər əraziləri arasındakı uyğunsuzluğu
belə şərh etdi:
"Bu, əslində
insan haqları və azadlığın texniki hesablanması nəticəsində baş verib. Daha əvvəl
dediyim kimi, biz yalnız xronologiyaya əsaslanmırıq. Rəqəmlərə baxsaq görərik
ki, Dağlıq Qarabağın Azərbaycandan fərqli olaraq, qeyri-azad ərazilərdən kənarda
qalmasına səbəb onun cəmi 1-2 balla fərqlənməsi olub. Yəni göstəricilər o qədər
də uzaq deyil...
Mən məsələnin
siyasi tərəfilə o qədər də maraqlanmıram. Ancaq etiraf olunmalıdır ki, Qarabağ ərazisində
yaşayan insanların oradakı mövcud inzibati strukturlarla mövcud əlaqəsinin bənzərinə
Bakıda rast gəlməz olmaz. Bakıdakı siyasi hakimiyyət get-gedə vətəndaşlar üçün əlçatmaza
çevrilir. Siz mənə prezident Əliyevin son illərdə yerli jurnalistlər üçün mətbuat
konfransı keçirdiyini xatırlada bilərsinizmi? Və yaxud da insanların dövlət
idarələri qarşısında növbəyə düzüldükləri barədə mənzərəyə azmı rast gəlmişik?
Bəli, etiraf
edirəm ki, biz əvvəlki illərdə bu məsələyə
daha həssas yanaşırdıq. Ancaq fakt budur ki, siyasi problemdən asılı olmayaraq,
biz Qarabağdakı yurisdiksiya baxımından qiymətləndirmə aparırıq. Əlbəttə,
burada bölğənin Azərbaycan əhalisinin də vəziyyətinə diqqət yetirilməlidir. Yəni,
bu mənada siz haqlısınız. Tamamilə doğrudur...".