کینیا خوراک کی شدید قلت کے پیشِ نظر حکومت قومی ہنگامی صورت حال کا اعلان کرنے کے لیے تیار ہے اور زراعت سے متعلق حکومتی پالیسیوں کا تفصیلی جائزہ لیا جارہاہے۔
گذشتہ جمعے کینیا کی حکومت نے کہا تھا کہ وہ جلد ہی خوراک کی قلت سے متعلق ہنگامی صورت حال کااعلان کردے کی کیونکہ ملک میں خشک سالی کے باعث ایک کروڑ افراد شدید مشکلات میں مبتلا ہوگئے ہیں۔
اس اعلان کے نتیجے میں ملک کی زراعت سے متعلق پالیسیوں کے بارے میں بحث مباحثے میں اضافہ ہوگیا ہے۔
وزارتِ زراعت کے اندر بدعنوانی کے الزامات ہیں اور اس بارے میں خدشات موجود ہیں کہ حکومت نے گذشتہ سال کے آغاز میں انتخابات کے بعد اس تشدد سے نمٹنے کے لیے کافی اقدامات نہیں کیے جس کے نتیجے میں ملک کے سب سے زیادہ زرخیز علاقے میں ہزاروں کاشت کاروں کو بے گھر ہونا پڑا تھا۔
حکومت کے ان سرکاری منصوبوں پر بھی توجہ ایک بار پھر مرکوز ہوگئی ہے جن کے تحت دریائے تانا کے ڈیلٹا میں ایک لاکھ ایکڑ زمین قطر کی حکومت کو پٹے پر دی جائے گی۔اس منصوبے کے تحت قطر ایتھوپیا اور شمال میں جنوبی سوڈان کے ساتھ تجارت میں آسانی پیدا کرنے کے لیے جزیرے لامو پر ایک بندرگاہ تعمیر کرے گا۔
لیکن کینیا کے بہت سے لوگوں کو تعجب ہے کہ کیا یہ بات مناسب ہے کہ اتنی بہت سی زرخیز زمین کسی دوسرے ملک کے حوالے کردی جائے جب کہ اپنے ملک کے اندر خوراک کا بحران ہو۔کینیا ایگریکلچرل ریسرچ انسٹی ٹیوٹ میں ہارٹی کلچر اینڈ انڈسٹریل کروپس کے اسسٹنٹ ڈائریکٹر لوسک واسلوا کہتے ہیں کہ میرا خیال ہے کہ ایسے حالات میں جب کینیا کے 30 فی صد باشندوں کو خوراک کی قلت کا سامناہے ، اتنی بڑی زمین پٹے پر کسی د وسرے ملک کو دینا غلط ہے۔
وہ کہتے ہیں کہ کینیا کے پاس اپنے خوراک خود پیدا کرنے کے لیے زمین کے استعمال کے ذرائع موجود ہیں۔ان کا کہنا ہے کہ ہم اس زمین کو کینیا اور قطر کے لیے خوراک اگانے کے لیے استعمال کرسکتے ہیں۔
تاہم کچھ دوسرے لوگوں کا کہناہے کہ اگر اس زمین پر غذائی فصلیں نہیں اگائی جارہیں تو غیر ملکی ملکیت پر اعتراض نہیں کیا جانا چاہیے۔نیروبی کے انسٹی ٹیوٹ آف پالیسی انالیسز اینڈ ریسرچ میں زراعت اور صنعت کے ایک ریسرچ فیلو جان اکوٹن کہتے ہیں کہ اگرآپ کے پاس زمین ہے اور آپ اسے استعمال نہیں کررہے اور کوئی دوسرا استعمال کرے اور آپ شکایت کریں تو یہ مسئلے کا حل نہیں ہے۔
وہ کہتے ہیں اس زمین پر کاشت کرنے سے مقامی طورپر روزگار کے مواقع پیدا ہوسکتے ہیں قطع نظر اس کے یہ پروجیکٹ کس کا ہے۔اور قطر زراعت کے بارے میں نیا علم کینیا لاسکتا ہے، جس سے مستقبل میں یہاں کے لوگوں کو فائدہ ہوسکتا ہے۔ کینیا کی حکومت کہہ چکی ہے کہ اس معاہدے کے تحت قطر کینیا کے استعمال کے لیے زمین بھی تیار کرے گا۔
سعودی عرب اور متحدہ عرب امارات نے بھی سوڈان اور سینگال سے علی الترتیب ایسے ہی معاہدے کیے ہیں۔ ماہرین کہتے ہیں کہ اگر مقامی لوگوں کو ایسے معاہدوں سے کوئی فائدہ نہ ہوتوایسے اتنظامات سے نوآبادیاتی نظام کے پیدا ہونے کا خطرہ ہوتا ہے جوسماجی بدامنی کو جنم دے سکتا ہے۔
کینیا کی حکومت کے منصوبوں سے ماحولیات کے بارے میں بھی خدشات پیدا ہوئے ہیں ۔ دریائے تانا کے ڈیلٹا پر چینی کی ایک فیکٹری بنانے کا منصوبہ بھی موجودہے۔ یہ منصوبہ ماحولیاتی تنظیموں اور مقامی راہنماؤں کی جانب سے ان اعتراضات کے بعد التوا کا شکار ہوگیا کہ اس کی تعمیر سے مقامی کمیونٹی کی سرگرمیاں متاثر ہوں گی جن میں سے بہت سے مویشی پالتے ہیں اور جن کا انحصار ڈیلٹا کے پانیوں پر ہے۔
E-mail
پرنٹ کیجیئے
