جنوبی تھائی لینڈ میں تشدد کے بارے میں ایمنسٹی انٹرنیشنل کی ایک رپورٹ میں بتایا گیا ہے کہ تھائی سیکیورٹی فورسز نے مسلم شورش کے خاتمے کی کوششوں میں گرفتار افراد کو منظم طورپر تشدد کا نشانہ بنایا ہے۔
ایمنسٹی کی رپورٹ میں کہا گیا ہے کہ سیکیورٹی فورسز پانچ سالہ مسلم شورش کے خاتمے کی کوششوں میں تشدد کےشکار جنوبی صوبوں میں منظم انداز اذیت رسانی اور بدسلوکی کی کارروائیاں کررہی ہے۔
رپورٹ میں کہا گیا ہے کہ اذیت رسانی کےاس سلسلے میں لوگوں کو مارا پیٹا جارہاہے ، موم بتیوں سے ان کے جسم داغے جارہے ہیں ، لوگوں کو گردن تک زندہ دفن کیا جارہاہے، انہیں بجلی کے جھٹکے دیے جارہے ہیں اور شدید گرمی اور شدید سردی میں رکھا جارہاہے۔ایمنسٹی کا کہنا ہے کہ اس اذیت رسانی کے نتیجے میں کم ازکم چار افراد ہلاک ہوچکے ہیں۔
اس رپورٹ میں مارچ 2007ءسے مئی 2008ءتک کی مدت کے دوران پیش آنے والے واقعات کا احاطہ کیا گیا ہے۔ رپورٹ میں کہا گیا ہے کہ بدسلوکی کے یہ واقعات2006ءکے انقلاب کے بعد قائم ہونے والی فوجی حکومت کے تحت اور دسمبر 2007ء میں انتخابات کے بعد برسراقتدار آنے والی سول انتظامیہ کے تحت ہوئے۔
رپورٹ میں سرحدی صوبوں میں 20 سے زیادہ غیر سرکاری حراستی مراکز کا حوالہ دیا گیا جہاں رپورٹ کے مطابق قیدیوں کے ساتھ شدید بدسلوکیاں کی جاتی ہیں۔
ایمنسٹی ایشیا پیسفک پروگرام کے ڈپٹی ڈائریکٹر ڈونا گیسٹ نے کہا کہ اس رپورٹ کا مقصد بدسلوکی کے ان واقعات کے بارے میں آگاہی پیدا کرنا ہے جنہیں اب زیادہ دیر تک برداشت نہیں کیا جاسکتا۔
ایمنسٹی نے یہ نشان دہی بھی کی کہ باغیوں کے حملوں میں بھی شدت آئی ہے ۔ 2005ءسے شورش پسندوں نے بم دھماکے ، سراڑانے اور بدھ اور مسلم سیکیورٹی فورسز اور عام شہریوں کو چلتی گاڑیوں سے گولیاں مار کر ہلاک کیاہے۔ اس کے علاوہ انہوں نے اسکولوں اور اساتذہ کو بھی اپنا ہدف بنایا ہے۔
ایمنسٹی کے ایک محقق بنجمن زواکی نے کہاہے کہ انہیں اس بات کا احساس ہے کہ سیکیورٹی فورسز شورش کو کچلنے کی کوشش میں شدید دباؤ کا شکار ہیں۔
ان کا کہنا تھا کہ سیکیورٹی فورسز کو اکثر اوقات ناکافی خفیہ رپورٹوں اورشواہد کی وجہ سے گرفتار افراد کو اذیت دینا یا ہراساں کرنا پڑتا ہے ۔ وہ کہتے ہیں کہ باغیوں کو زبردستی اقبال جرم کرا نا دیر پا حل نہیں ہے، کیونکہ اس طرح جنوبی علاقے میں حکومت کے خلاف نفرت بڑھ رہی ہے۔
وزیر اعظم ابھیست وجاجیوا کی زیر قیادت نئی حکومت اس عزم کا اظہار کرچکی ہے کہ وہ جنوب میں عدالتی نظام کو بہتر بنائے گی۔ یہ علاقہ مارشل لا اور ہنگامی حالت کے حکم کے تحت فوجی کنٹرول میں ہے۔ لیکن تجزیہ کار کہتے ہیں کہ اگر جنوب میں سویلین کنٹرول لانے کے لیے کوئی اقدام کیا گیا تو فوج اس کے خلاف مزاحمت کرسکتی ہے۔