عالمی بنک رواں سال کے دوران پاکستان کو نوے کروڑ ڈالر کا قرضہ فراہم کرے گا، جو  غربت میں کمی کے لیے ترقیاتی منصوبوں پر خرچ کیا جائے گا۔

یہ بتائے ہوئے سرکاری ذرائع کا کہنا تھا کہ  پاکستان نے اپنے مالی مشکلات سے نمٹنے اور زرِ مبادلہ کی ضروریات پوری کرنے کے لیے عالمی مالیاتی ادارے کے پروگرام میں شمولیت اختیار کی ہے جِس کے تحت آئی ایم ایف پاکستان کو 7.6ارب ڈالر کا قرضہ فراہم کر رہا ہے۔

قرضے کی پہلی قسط تین ارب دس کروڑ ڈالر پاکستان کو مل چکی ہے۔ باقی رقم سہ ماہی قسطوں میں دو سال کے دوران فراہم کی جائے گی۔

آئی ایم ایف سے قرضے کی پہلی قسط ملنے کے بعد ملک کے زرِ مبادلہ کے ذخائر میں بہتری آئی ہے۔اسٹیٹ بینک کے مطابق، اِس وقت زرِ مبادلہ کے ذخائر نو ارب 66کروڑ ڈالر ہیں۔

آئی ایم ایف سے قرضے کی فراہمی کے نتیجے میں پاکستان نادہندہ ہونے سے بچ گیا۔ عالمی بینک سے جو 90کروڑ ڈالر رواں مالی سال کے دوران ملیں گے اُس میں سے پچاس کروڑ ڈالر غربت کی کمی کے منصوبوں پر، جب کہ 40کروڑ ڈالر ترقیاتی منصوبوں پر خرچ کیے جائیں گے۔

پاکستان کو بجٹ ضروریات پوری  کرنے کے لیے  چین سے بھی پچاس کروڑ ڈالر کا قرضہ مل رہا ہے اور توقع کی جارہی ہے کہ یہ رقم اِس ماہ پاکستان کو مل جائے گی۔

عالمی بینک اور چین سے ملنے والی رقوم سے پاکستان کے توازنِ ادائگی پر دباؤ ہوگا۔ پاکستان، دوست ملکوں اور دیگر مالیاتی اداروں سے مدد کی درخواست کرتا رہا مگر سب نے ہی مالی امداد کو آئی ایم ایف پروگرام میں شرکت سے مشروط کر دیا تھا۔

آئی ایم ایف سے معاملات طے ہونے کے بعد اب کثیرالقومی مالیاتی ادارے اور دوست ممالک پاکستان کی مدد کر رہے ہیں۔ ایران اور سعودی عرب سےاُدھار تیل کی فراہمی پر بات چیت ہو رہی ہے، جب کہ دیگر ملکوں اور مالیاتی اداروں سے بھی مذاکرات جاری ہیں۔

پاکستان دوست ملکوں، خصوصاً چین سے ترقیاتی منصوبوں میں سرمایہ کاری کے لیے بھی مذاکرات کر رہا ہے۔ اِن منصوبوں میں توانائی کے منصوبے شامل ہیں۔