چین کا دارالحکومت بیجنگ

چھ ہی ماہ قبل چین  کے دارالحکومت بیجنگ میں اولمپکس کھیلوں کے دوران کھلاڑیوں اور شائقین نے دیکھا کہ چین نے کس کامیابی کے ساتھ دنیا کے آلودہ ترین شہر کو کھیلوں کے لیے محفوظ بنادیا تھا۔  فضائی آلودگی کم کرنے کے پہلے حکومت نے کئی اقدامات اٹھائے۔  بہت سے لوگوں کے ذہنوں میں یہ ایک سوال اٹھ رہا ہے کہ کیا یہ اقدامات جاری رکھ سکیں گے؟

اولمپکس سے قبل آلودگی کی وجہ سے دھوئیں کے سیاہ بادل شہر پر چھائے رہتے تھے اور بیجنگ دنیا بھر میں اپنی فضائی آلودگی کی وجہ سے جانا جاتا تھا۔  

شہر کی خوبصورتی بحال کرنے کے لیے اولمپک کھیلوں کے منتظمین نے بھاری صنعتوں کو بند کردیا اور تقریباً 30 لاکھ گاڑیوں پر پابندی لگا دی تھی۔

اقوام متحدہ کے ترقیاتی ادارے کے کنٹری ڈائریکٹر خالد ملک کا کہناہے کہ اولمپکس کھیل شہر میں تبدیلی لانے میں مدد گار ثابت ہوئے ہیں۔

بیجنگ شہر کی میونسپل انتظامیہ واضح طورپر یہ کہہ چکی ہے کہ آلودگی ختم کرنے کے اقدامات کو آغاز سمجھتے ہیں اختتام نہیں۔  

کھلاڑیوں کی واپسی کے بعد شہر کے حکام نے گاڑیوں پر پابندی میں نرمی کردی ہے۔  چھ ماہ تک جاری رہنے والی عبوری مدت میں مالکان کو ہفتے میں ایک دن گاڑی اپنے گھر چھوڑنی ہوتی تھی۔

قدرتی گیس سے چلنے والی بسیں سڑکوں پر نظر آتی ہیں۔  مسافروں کی حوصلہ افزائی کے لیے بسوں کے کرایوں میں 60 فی صدتک کمی کی گئی ہے اور دارالحکومت میں چار نئی سب ویز لائنز شروع کی گئی ہیں۔

اولمپک کھیلوں کے دوران ایسا لگتا تھا کہ جیسے ہرروز آسمان نیلا ہوا اور اب چھ ماہ کے بعد پھر سے خراب موسم لوٹ رہا ہے۔

باقی ممالک کی نسبت چین میں زیادہ تیزی سے صنعتی ترقی ہورہی ہےاور اس کا شمار سب سے زیادہ آلودگی پھیلانے والے ممالک میں ہوتا ہے۔

ماحولیاتی تحفظ کے لیے کام کرنے والے ادارے توقع رکھتے ہیں کہ بیجنگ شہر کے اقدامات ملک کے باقی حصوں کے لیے ایک نمونہ ثابت ہوں گے۔