امریکہ میں مسلمانوں نے پیر کے روز عید منائی۔امریکہ میں اگرچہ مسلمانوں کی تعداد پچاس سے ستر لاکھ کے درمیان بتائی جاتی ہے لیکن یہ کل امریکی آبادی یعنی 30 کروڑ کے مقابلے میں بہت کم ہے ۔ یہاں اکثریت عیسایت سے تعلق رکھتی ہے ۔ چنانچہ امریکی میں عید کے موقع پر وہ گہما گہمی اور رونق دکھائی نہیں دیتی جو اسلامی ملکوں کا خاصا ہے۔
یہاں اکثر مسلم ممالک کے برعکس عید کے موقع پر تعطیل بھی نہیں ہوتی ۔ عید کی نماز کی ادائیگی کے لیے مسلمانوں کو اپنے کام پر چند گھنٹے یا پھر پورے دن کی چھٹی لینی پڑتی ہے۔ امریکہ کے ان شہروں اور علاقوں میں جہاں مسلمان کی ایک بڑی تعدادمقیم ہے، مساجد اور ان کے کمیونٹی سینٹر موجود ہیں۔ عید کے اجتماع ان مساجد یا کرائے پر حاصل کردہ بڑے ہال میں منعقد کیے جاتے ہیں۔
مسلم اکثرتی علاقوں میں عید کے موقع پر کافی رونق دیکھنے میں آتی ہے۔ کئی روز قبل عید کی شاپنگ اور تیاریاں شروع ہوجاتی ہیں۔ اور عید کے دن لوگ دوستوں اور عزیزوں سے ملاقات کے لیے جاتے ہیں یاانہیں اپنے ہاں کھانے پر مدعو کرتے ہیں۔
امریکی دارالحکومت واشنگٹن اور اس کے مضافاتی علاقوں میں دنیا کے مختلف ملکوں سے تعق رکھنے والے مسلمانوں کی ایک بڑی تعداد مقیم ہے۔ یہاں عید کا سب سے بڑا اجتماع کنونشن سینٹر کی ساتویں شاہراہ ر واقع مسلمانوں کے ایک مرکز میں ہوتا ہے۔ اس موقع پر یہاں عید میلہ بھی لگایا جاتا ہے۔ اس عید میلے کی تفصیلات اس ویڈیو میں موجود ہیں۔