امریکی صدر جارج بش نے کہا ہےکہ دنیا کے آٹھ بڑے صنعتی
ملکوں کےاس سال کے سربراہی اجلاس میں ماحولیاتی تبدیلی اور دوسرے مسائل پر نمایاں
پیش رفت ہوئی ہے۔
واشنگٹن واپسی سے قبل شمالی جاپان میں بدھ کے روز نامہ
نگاروں سے گفتگو کرتے ہوئے صدر بش نے کہا کہ 2050ء تک گرین ہاؤس گیس کے اخراج میں
کٹوتی کی حکمت عملی اہم ہے کیونکہ یہ تمام بڑی معیشتوں کو مذاکرات کی میز پر لائے
گی۔
صدر بش نے اس تین روزہ سربراہی اجلاس میں پروٹیکشن ازم کے خلاف مزاحمت، بیماری کے خلاف لڑائی اور ترقی
کے فروغ کے سلسلے میں کی جانے والی کوششوں کی بھی تعریف کی۔
بدھ کے روز ایک اجلاس کے دوران دنیا کے ترقی یافتہ ملکوں نے ماحولیاتی تبدیلی کے خلاف
جنگ میں تعاون کابھی عہد کیا۔
جاپانی وزیر اعظم یاسو فوکودا نے کہا کہ جی ایٹ کے راہنماؤں
نے بدھ کے روز آٹھ بڑی معیشتوں کے اپنے ہم منصبوں کے ساتھ سربراہی اجلاس کے مقاصد
پر گفتگو کی جن میں ایشیا کی بڑی معیشتیں چین، آسٹریلیا اور بھارت شامل تھیں۔
اجلاس میں شرکت کرنے والے عہدے داروں نے کہا ہے ترقی پذیر
ملکوں کو 2050ءکے لیے جی ایٹ کے نصب العین کے بارے میں تحفظات ہیں۔
صرف تین ابھرتی ہوئی معیشتوں، انڈونیشیا، جنوبی کوریا اور
آسٹریلیا نے گیسوں کے اخراج میں 50 فی صد کمی کے منصوبے سے اپنی وابستگی ظاہر کی
جب کہ چین اوربھارت نے ایسا نہیں کیا۔