افغانستان میں جنسی تشدد کا نشانہ بننے والی ایک 14برس کی لڑکی کی ماں اور بھائى پر خاندان کی عزت بچانے کے لیے اُس کے حمل کو مبیّنہ طور پر ایک بے ڈھب طریقے سے ضائع کرنے کا الزام عائد کیا گیا ہے۔
وسطی صوبے بامیان کے عہدے داروں نے کہا ہے کہ وہ لڑکی پانچ ماہ سے حاملہ تھی جب اُس کے خاندان نے اُسے مویشیوں کے ایک باڑے میں لے جاکر بے ہوشی کی دوا استعمال کیے بغیر بلیڈوں سے کاٹ پیٹ کر اُس کا حمل گرا دیا۔ انہوں نے بعد میں مبینہ طور پر عام سوئى دھاگے سے اُس کے زخم کو سی دیا۔
جب لڑکی کے زخم پک گئے تو والدین اُسے ایک ہسپتال لے گئے جہاں اُنہوں نے بتایا کہ لڑ کی کو کسی کتّے نے کاٹ لیا تھا۔ لیکن ڈاکٹروں نے جلد ہی اس جھوٹ کو پکڑ لیا۔ جمعے کے روز تک لڑکی کی حالت نازک تھی۔
اُس لڑی کے بھائى اور اُس شخص کو ، جس پر لڑکی کی آبرو ریزی کرنے کا الزام ہے، دونوں کو گرفتار کرلیا گیا ہے۔
عورتوں کے ساتھ ناروا سلوک خاص طور پر اُن سخت روایت پرست معاشروں میں انسانی حقوق کا ایک سنگین مسئلہ ہے ، جہاں شادی کے بغیر جنسی تعلق کو سخت معیوب سمجھا جاتا ہے ۔ حتیٰ کہ جنسی تشدد کا نشانہ بننے والی عورتوں کو بھی معاف نہیں کیا جاتا۔