ییل یونی ورسٹی

آگر آپ کو ہارورڈ یونی ورسٹی یا آکسفرڈ یونی ورسٹی جانے کا موقع نہیں ملا تو پریشان ہونے کی بات نہیں ہے۔ اب آپ لاکھوں ڈالر خرچ کیے بغیر نہ صرف ان دونوں بلکہ دنیا کی بیشتر اعلیٰ ترین یونی ورسٹیاں اپنے کورس ویڈیو اور آڈیو کی شکل میں آن لائن پیش کر رہی ہیں، جہاں سے آپ انھیں بالکل مفت ڈاؤن لوڈ کر کے گھر بیٹھے مہنگی ترین کلاسوں میں شرکت کر سکتے ہیں۔

آپ کا مضمون چاہے کوئی بھی، ان عالی شان یونی ورسٹیوں میں سے کسی نہ کسی میں آپ کا متعلقہ شعبہ ضرور مل جائے گا۔ اور اگر مضمون نہ بھی ہو تو کیا حرج ہے کہ اپنی پسندیدہ کسی بھی مضمون کا مکمل کورس ڈاؤن لوڈ کر کے اپنی فرصت سے اسے مکمل کر لیا جائے۔ پھر آپ بھی فخر سے  اپنے دوستوں کے سامنے شیخی بگھار سکیں گے کہ  آپ نے ہارورڈ، ییل، آکسفرڈ، ایم آئی ٹی یا اس جیسی کسی مہنگی ترین یونی ورسٹی سے فلاں مضمون میں کورس کیا ہے۔

آپ کوئی نئی زبان سیکھنا چاہتے ہیں، میڈیسن ، سائنس، یا کمپیوٹر کے کسی شعبے کے بارے میں معلومات حاصل کرنا چاہتے ہیں، یا پھر موسیقی، فلم یا ادب و شعر کے رسیا ہیں، آپ کو ان یونی ورسٹیوں کے کورسوں سے بہتر کوئی اور وسیلہ نہیں ملے گا۔ اور ویسے بھی مرزا غالب فرما گئے ہیں: 

مفت ہاتھ آئے تو برا کیا ہے؟

ذیل میں ہم چند ایسے کورسوں کے بارے میں بتا رہے ہیں جو ہمارے خیال سے علم و فن کے ہر شوقین کو ضرور کرنے چاہیئیں:

آکسفرڈ یونی ورسٹی

فنونِ لطیفہ

آرٹ کی تاریخ: آکسفرڈ

آرٹ کے بارے میں جاننے کے لیے آکسفرڈ سے بہتر اور کون سا تعلیمی ادارہ ہوگا؟

مصوری اور ادب کے ذریعے اپنی شخصیت کا اظہار کریں: ایم آئی ٹی
ہر انسان کے اندر تخلیقی صلاحیتیں موجود ہوتی ہیں۔ بات صرف اپنی آواز پہچاننے کی  اور اس کے اظہار کی ہے۔

ڈرامہ نگاری: ایم آئی ٹی
آج کل ٹی وی چینلوں کی بھرمار کی وجہ سے ڈرامہ نگاروں کی چاندی ہو گئی ہے۔ اگر آپ کو بھی لکھنے لکھانے کو شوق ہے لیکن یہ معلوم نہیں کہ ڈرامہ کیسے لکھا جاتا ہے، یہ کورس خاص طور پر آپ ہی کے لیے بنایا گیا ہے۔

امریکہ کے مشہور شاعر رابرٹ فراسٹ

جدید انگریزی شاعری: ییل
بیسویں صدی کی انگریزی شاعری نے کئی رنگ بدلے ہیں، اور ان کا اردو شاعری پر بھی گہرا اثر ہوا ہے۔ ییل یونی ورسٹی کا یہ زبردست کورس پوری صدی کا احاطہ کرتا ہے اور اس میں فراسٹ، ایلیٹ، پاؤنڈ اور ییٹس جیسے اساتذہ پر تفصیلی بحث شامل ہے۔

بیسویں صدی کا فکشن: ایم آئی ٹی
آپ نے کافکا، جیمز جوئس، فاکنر، کونریڈ وغیرہ کا نام سنا ہے لیکن یہ سمجھ میں نہیں آتا کہ کہاں سے آغاز کیا جائے، تو یہ کورس آپ کے لیے ہے۔

جنوبی ایشیا کا ادب: ایم آئی ٹی
اس کورس میں پاکستان، بھارت، بنگلہ دیش، سری لنکا اور نیپال کی ثقافت کا جائزہ ان ممالک کے ادب اور سینما کی روشنی میں پیش کیا گیا ہے۔ اور ان کے سماجی، تاریخی اور سیاسی پسِ منظر پر بھی بحث کی گئی ہے۔سعادت حسن منٹو، منشی پریم چند، ستیہ جیت رائے اور شیام بینیگل وغیرہ کا تفصیلی مطالعہ اس کورس میں شامل ہے۔

چین کی روایتی شاعری، فکشن اور ڈراما: ایم آئی ٹی
دنیا کا کون سا ملک ہے جو تہذیب و ثقافت کے لحاظ سے چین کا مقابلہ کر سکے؟ سو اسی ملک کی ثقافت کو اس کے ادب کے ذریعے جانیئے۔

جاپانی اینیمی فلم

جاپانی ادب اور سنیما
کون ہے جو جاپانی صنفِ شاعری ہائیکو سے واقف نہیں ہے؟ اور پھر جاپانی فلموں نے دنیا بھر کی فلموں کو متاثر کیا ہے اور ہالی وڈ تک میں ان کے چربے بنائے جاتے ہیں۔

میڈیا اور اس کے معاشرے پر اثرات
اس کورس میں مختلف اقسام کے میڈیاکا تقابلی جائزہ پیش کیا گیا ہے اور یہ دیکھا گیا ہے کہ  آج کے دور میں میڈیا عوامی رائے عامہ کو متاثر کو موڑنے میں کیا کردار ادا کر رہا ہے۔
 
زبانیں: ایم آئی ٹی

کتابوں یا سی ڈی کی مدد سے زبان سیکھنا بہت مشکل ہے، لیکن کلاس کا ماحول جدا ہوتا ہے، اور یہاں دوسرے طلبا کے ساتھ زبان سیکھنا بے حد آسان ہو جاتا ہے۔

فرانسیسی، جرمن، جاپانی، چینی

سائنس اور  ٹیکنالوجی 

سب کچھ سیکھیئے۔
جی ہاں یہ نام ہے ایم آئی ٹی کے ایک کورس کا۔ تو کیا حرج ہے، کچھ وقت نکال کر یہ کورس کر ڈالیے اور جانیے کہ دنیا بھر کا علم کیسے حاصل کیا جا سکتا ہے

انفارمیشن ٹیکنالوجی کےبنیادی تصورات: ایم آئی ٹی
آپ نے ابتدائی کورس کر بھی رکھے ہوں تو ایم آئی ٹی سے اپنے مضمون کو پکا کرنے میں کیا حرج ہے؟

ابتدائی فزکس: ییل

نفسیات کے بنیادی اصول: ییل

فلکیاتی فزکس کے ابتدائی اصول
آکسفرڈ کی جانب سے ایسٹروفزکس کے لیکچر حاصل کیجیئے۔