بھارتی زیرِ انتظام کشمیر کی پولیس نے دعویٰ کیا ہے کہ اُس نے فوج کے ساتھ مل کر کی گئی کاررائی کے دوران سب سے بڑی مقامی عسکری تنظیم حزب المجاہدین کے بانی کمانڈر ماسٹر احسن ڈار کو گرفتار کر لیا ہے۔
ڈپٹی انسپکٹر جنرل آف پولیس عبد الغنی میر نے بارہ مولا میں نامہ نگاروں کو بتایا کہ ماسٹر احسن ڈار کی بارہ مولا کے علاقے کے ایک گھر میں موجود ہونے کی اطلاع ملنے پر یہ آپریشن شروع کیا گیا۔
پولیس افسر نے بتایا کہ ماسٹر احسن ڈار نے کوئی مزاحمت نہیں دکھائی اور یہ کہ گرفتاری کے وقت وہ غیر مسلح تھا۔
پولیس عہدے دار نے دعویٰ کیا کہ حزب المجاہدین کا بانی کمانڈر کئی سال پاکستان میں گزارنے کے بعد بنگلہ دیش کے راستے بھارت میں داخل ہونے میں کامیاب ہوا تھا، اور فی الوقت بھارتی کشمیر میں سرگرم عسکری جماعتوں کے درمیان رابطہ کار کے طور پر کام کر رہا تھا۔
اُنھوں نے یہ بھی بتایا کہ ماسٹر احسن ڈار 1999ء میں جیل سے چھوٹنے کے بعد کئی مرتبہ غیر قانونی طور پر سرحد عبور کرکے پاکستان گیا تھا اور اِس دوران اپنے افرادِ خانہ کو بھی ہمسایہ ملک میں منتقل کرنے میں کامیاب ہوگیا۔