سری لنکا کی فوج نے کہا ہے کہ باغیوں سے اُن کے کنٹرول کے آخری علاقے کو چند ہفتوں کے اندر اندر واپس چھین لیا جائے گا۔

حکام نے جمعرات کو روز کہا ہے کہ ایسا دکھائى دیتا ہے کہ تامل ٹائیگر شمال کے شہر مُلائى تیوو میں حکومت کے خلاف آخری جنگ لڑنے کی تیاری کررہے ہیں۔یہ شہر باغیوں کے باقی ماندہ آخری مضبوط ٹھکانوں میں سے ایک ہے۔

مسلح افواج کے کہنا ہے کہ جمعرات کو اس سے پہلے فوج نے جزیرہ نما جافنا میں پلّائى شہر پر قبضہ کرلیا۔ عہدے داروں نے کہا ہے کہ جمعرات ہی کے روز جنگی طیاروں نے شمال میں باغیوں کی دو کشتیوں پر بمباری کی۔

فوج نے باغیوں کے دارالحکومت کلی نوچھی پر پچھلے ہفتے قبضہ کرلیا تھا۔
تامل ٹائیگر باغیوں نے فوج کی حالیہ فتوحات کو غیر اہم قرار دیتے ہوئے نظر انداز کردیا ہے اور حکومت کے خلاف جنگ جاری رکھنے کا عزم ظاہر کیا ہے۔

اسی دوران کولمبو میں نامعلوم مسلح افراد نے ایک ایسے اخبار کے ایڈیٹر کو گولی مار کر ہلاک کردیا، جو حکومت پر کڑی نکتہ چینی کرتا رہا ہے۔