اسلام آباد میں وزیراعظم گیلانی اور امریکہ کے نومنتخب نائب صدر جو بائیڈن کے ساتھ ملاقات

امریکہ کے نو منتخب نائب صدر جوزف بائیڈن نے کہا ہے کہ نئی امریکی انتظامیہ پاکستان میں جمہوریت کو مستحکم بنانے اور انسدادِ دہشت گردی کی کوششوں میں مدد دے گی اور اِس کی سماجی اور اقتصادی ضروریات کو پورا کرنے کے حوالے سے بھی معاونت فراہم کرے گی۔

اِن خیالات کا اظہار اُنھوں نے جمعے کے روز اسلام آباد میں صدر آصف علی زرداری کے ساتھ ملاقات میں کیا۔

جو بائیڈن نے دہشت گردی کے خلاف جنگ میں پاکستان کی قربانیوں کا اعتراف کرتے ہوئے پاکستان کو اِس جنگ میں نہایت اہم اتحادی قرار دیا۔

اُنھوں نے اِس امید کا اظہار کیا کہ پاکستان اور بھارت اپنے درمیان موجود کشیدگی کو دور کرنے اور اختلافات کو پُر امن طور پر حل کرنے میں کامیاب ہوجائیں گے۔

امریکہ کے منتخب نائب صدر نے وزیرِ اعظم یوسف رضا گیلانی سے بھی ملاقات کی۔ وزیرِ اعظم نے اُن پر زور دیا کہ امریکی انتظامیہ پاکستان کے لیے غیر عسکری امداد میں اضافے کے بِل اور اُس کے قبائلی علاقوں کی ترقی کے لیے تعمیرِ نو مواقع زون قائم کرنے کے وعدے پر جلداز جلد عمل درآمد کرے۔

جو بائیڈن نے یقین دلایا کہ پاکستان کی دفاعی ضروریات کو پورا کرنے کے لیے اس کے نیم فوجی دستوں کو سازو سامان اور تربیت فراہم کی جائے گی۔

اُنھوں نے کہا کہ اوباما انتظامیہ کواِس بات کا احساس ہے کہ پاکستان اکیلا دہشت گردی کے خلاف جنگ نہیں لڑ سکتا۔لہٰذا پاکستان کی ہر ممکن طریقے سے مدد کی جائے گی۔ اُن کا کہنا تھا کہ امریکہ پاکستان کے ساتھ تعلقات کے ایک نئے دور کا آغاز کرنا چاہتا ہے۔