انٹرنیٹ پر معلومات کی مشہور ویب سائٹ، ویب ایم ڈی

روزمرہ زندگی میں دن بدن انٹرنیٹ کے استعمال میں مسلسل اضافہ ہورہاہے اور ایک حالیہ جائزے میں بتایا گیا ہے کہ 2008ء میں لاکھوں امریکیوں نے بیماریوں اور ان کے علاج سے متعلق معلومات حاصل کرنے کے لیے انٹرنیٹ کا سہارا لیا۔ 

رپورٹ کے مطابق علاج اور بیماریوں سے متعلق معلومات کے لیے انٹرنیٹ پر جانے والے اکثر افراد کا کہناہے کہ اس کے باوجود کہ اس بات کی کوئی ضمانت نہیں ہے کہ انٹرنیٹ پر مطلوبہ معلومات مل سکتی ہیں یا وہاں موجود معلومات قابل اعتماد ہوسکتی ہیں، انٹرنیٹ کے استعمال سے زندگی محفوظ بنانے میں مدد مل سکتی ہے۔
40 سالہ سٹیسی اس وقت ایک مشروب سے لطف اندوز ہورہی تھیں جب اچانک انہیں شدید درد محسوس ہوا۔ ان کا کہناہے کہ میری گردن میں شدیددرد اٹھا جو اس سے پہلے کبھی نہیں ہوا تھا۔

چند روز کے بعد مشروب پیتے ہوئے انہیں درد کا دوبارہ دورہ پڑا۔ انہوں نے انٹرنیٹ پر جاکر الکحل پینے کے بعد درد اٹھنے پر تحقیق کی۔ یہ تحقیق انہیں ان سائٹس پر لے گئی جن کا تعلق اس تکلیف سے تھا۔
وہ اس وقت خوف زدہ ہو کر رہ گئی جب ویب سے انہیں پتہ چلا کہ یہ علامات کینسر کی ہیں مگر سٹیسی نے اسے نظر انداز کردیا۔

کچھ عرصے کے بعد سٹیسی کو اپنی گردن میں ایک چھوٹاسا ابھارمحسوس ہوا۔ وہ ایک ڈاکٹر کے پاس گئیں۔ ڈاکٹر نے ابھار کی تشخیص انفکشن کے طور پر کی۔جب تکلیف میں کمی نہ ہوئی تو انہیں ماہر امراض سرطان ڈاکٹر ایلن لکٹن کے پاس جانا پڑا۔

ڈاکٹر ایلن کا کہناہے کہ جب میں نے سٹیسی کی کہانی سنی تو میرا دھیان گردن کے ایک مخصوص کینسر کی طرف گیا کیونکہ الکوحل کے نتیجے میں ایسے درد کا تعلق اس مرض سے ہوسکتا ہے اگرچہ ایسے واقعات بہت ہی کم ہوتے ہیں۔

لیبارٹری کے نتائج نے سٹیسی میں گردن کے کینسر کی تصدیق کردی۔مگر چونکہ اس مرض کا ابتدا میں ہی پتا چل گیا تھا اس لیے دواؤں اور برقی شعاعوں کے ذریعے اس پر قابو پالیا گیا۔اب وہ اپنی صحت یابی کی خوشی منارہی ہیں۔

انٹرنیٹ کے عالمی اعدادو شمار کے مطابق دنیا بھر میں تقریباً 50 کروڑ لوگ انٹرنیٹ پر باقاعدگی سے جاتے ہیں اور مختلف سائٹس پر تحقیق کرتے ہیں۔لاکھوں افراد ہر سال انٹرنیٹ سے صحت ، علاج اور ادویات کے بارے میں معلومات حاصل کرتے ہیں۔ کولمبیا یونیورسٹی سے منسلک ڈاکٹر کیلی ہارنگ کہتی ہیں کہ انٹرنیٹ پر بہت سی تازہ ترین معلومات موجود ہوتی ہیں۔ مختلف بیماریوں کی علامتیں بھی ایک جیسی ہوتی ہیں چنانچہ اگر آپ کے سر میں درد ہے تو اس کا مطلب یہ نہیں ہے کہ آپ کے دماغ میں کوئی رسولی ہے۔اس کی اور وجوہات بھی ہوسکتی ہیں۔

انٹرنیٹ پر بیماریوں اور ان کے علاج کے بارے میں معلومات حاصل کرنے میں سب سے بڑا مسئلہ یہ ہے کہ وہ ادھوری بھی ہوسکتی ہیں اور ان میں غلطی کا امکان بھی ہوسکتا ہے۔ تاہم ڈاکٹروں کا کہناہے کہ انٹرنیٹ کی قابل بھروسہ سائٹس پر جانے سے مریضوں کو فائدہ ہوسکتا ہے۔ ماہرین کا کہنا ہے کہ صحت کے حوالے سے قابلِ اعتماد سائٹس میں WebMD اور معروف اسپتالوں اور تحقیقی اداروں کی سائٹس شامل ہیں۔