امریکی ڈیموکریٹ صدارتی امیدوار براک اوباما

امریکی ڈیموکریٹ صدارتی امیدوار براک اوباما نے ان  چھوٹے کاروبار کرنے والوں کے لیے ٹیکس میں  چھوٹ کی تجویز پیش کی ہے جو اپنے ملازمین کو ہیلتھ انشورنس فراہم کرتے ہیں۔

سینیٹر اوباما نے اس تجویز کا اعلان  اتوار کے روز سان ڈیاگو کیلی فورنیا میں  شہری حقوق کی ایک ممتاز ہسپانوی تنظیم  سے خطاب کرتے ہوئے کیا۔

ٹیکس میں چھوٹ سے متعلق دستاویزات میں کہا گیا ہے کہ چھوٹی کاروباری کمپنیاں ہر سال امریکہ کے زیادہ تر نئے روز گار پیدا کرتی ہیں  اور وہ حالیہ اقتصادی سست روی سے بری طرح متاثر ہوئی ہیں۔

اوباما کے امکانی ری پبلیکن مخالف امیدوار سینیٹر جان مکین پیر کے روز اسی ہسپانوی تنظیم سے خطاب کررہے ہیں۔ سینیٹر میک کین کے ایک اعلیٰ مشیر نے اوباما کی ہیلتھ کیئر ٹیکس کریڈٹ کی تجویز کے بارے میں کہا کہ اس میں زیادہ تفصیلات موجود نہیں ہیں۔