امریکی ریاست پنسلوانیا کی ایک اہم یونیورسٹی کارنیگی میلن میں جنوبی ایشیائی ممالک سے تعلق رکھنے والے طالب علموں نے ہفتہ پاکستان کے سلسلے میں مختلف تقریبات کا اہتمام کیا۔ ان تقریبات کا مقصد اس ہفتے کے دوران پاکستان کی ثقافت، تاریخ، روایات اور زندگی کے مختلف شعبوں کے بارے میں معلومات فراہم کرنا تھا۔
ہفتہ پاکستان کے دوسرے روز جنوبی ایشیائی ممالک کے طلباء کی تنظیم نے، جن میں اکثریت بھارتی طالب عملوں کی ہے، پاکستان کے پردے کے پابند گھرانوں میں خواتین کے استعمال میں آنے والے برقعوں کی نمائش کی۔ اس موقع پر برقع پوش لڑکیوں نے مختلف بینر اور کتبے اٹھائے ہوئے تھے جن پر مختلف پیغامات درج تھے۔ ان پیغامات میں یہ کہا گیا تھا کہ یہ پہناوا پاکستان کے بعض طبقات میں زیر استعمال ہے۔ مگر اس کے پہننے والے امن پسند اور انسانیت دوست افراد ہیں۔ ان کا دہشت گردی یا انتہاپسندی سے کوئی تعلق نہیں ہے۔ اور یہ پہناوا ان کی ایک ثقافتی پہچان ہے۔