پاکستان اوراس کے گردو نواح میں وائس آف امریکہ کا نیاٹیلی ویژن پروگرام’خبروں سے آگے‘پسندیدگی سے دیکھا جارہا ہے۔ یہ پروگرام ہفتے میں پانچ بار حالاتِ حاضرہ کا پس منظر، سیاق و سباق اور تجزیہ جدیداور معیاری طرزِ پیشکش کے ساتھ نشر کرتا ہے۔   خبروں سے آگے وہ جھروکا ہے جس میں آپ دنیا اور خصوصی طور سے جنوبی ایشیا میں ہونے والے اہم واقعات کا تجزیہ دیکھنے کے ساتھ ساتھ امریکہ میں بسنے والے مسلمانوں کی زندگی میں بھی جھانک سکتے ہیں۔ یہ دیکھنے کے لیے کہ انھیں اپنی روزی کمانے کے علاوہ مذہب اور اظہارِ رائے کی کتنی آزادی ہے۔     جدید دور کے تقاضوں سے ہم آہنگ’خبروں سے آگے‘ہفتہ اور اتوار کےسوا ہر روز شام ساڑھے سات بجے جیو ٹیلی ویژن پر اور ہر صبح 8:25 سے لے کر 8:55 پر آج ٹیلی ویژن پر دلچسپ اور منفرد انداز میں تازہ ترین خبریں، معاشرتی اور سماجی موضوعات پر مبنی رپورٹیں، انٹرویو اور تبصرے دکھاتا ہے۔ اس کے خاص موضوعات میں امریکہ اور پاکستان کےشہریوں کے طرزِ زندگی کا تقابل اور امریکہ میں مقیم پاکستانیوں کی زندگیوں اور امریکی ثقافت میں ان کی شمولیت پر مبنی رپورٹیں شامل ہیں۔ علاوہ ازیں ہمارے پروڈیوسروں کی ٹیم حالاتِ حاضرہ، عالمی منظرنامہ، فن و ثقافت، تفریح اور دوسرے موضوعات کابھی احاطہ کرتی ہے۔ ہمارے پیش کاروں میں سے بیشتر کا تعلق پاکستان سے ہےجو اپنے ساتھ نیا زاویہء نگاہ اور اندازِ فکر لے کر آئے ہیں۔ ہماری مشترکہ کوشش ہے کہ’خبروں سے آگے‘ کو بیک وقت مقامی اور بین الاقوامی رنگ دیا جائے۔