حال ہی میں معزول چیف جسٹس افتخار چوہدری چندروزہ دورے پر امریکہ آئے۔  وہ جہاں بھی گئے، ان کا بڑی گرم جوشی سے  خیرمقدم کیا گیا۔  امریکہ میں آباد پاکستانی کمیونٹی ، وکلا ، ججوں اور طلبانے  ان سے ملاقاتیں کی اور قانون کی حکمرانی کے لیے ان کی جدوجہد کو سراہا۔

امریکہ کی معروف اور تاریخی یونیورسٹی ہارورڈ کے لاءسکول نے انہیں اپنے اعلیٰ ترین اعزاز، میڈل آف فریڈم، سے نواز۔  یونیورسٹی کی ایک صدی سے زیادہ پرانی تاریخ میں یہ ایوارڈ آج تک صرف تین شخصیات نے حاصل کیا ہے جن میں نیلسن منڈیلا  بھی شامل ہیں۔

معزول چیف جسٹس نے نیویارک، بوسٹن اور واشنگٹن میں  اپنے اعزاز میں منعقد کی جانے والی تقاریب میں شرکت کی۔  دارالحکومت واشنگٹن میں انہوں نے قانون کے طالب علموں کو پاکستان میں عدلیہ کے کردار کے حوالے سے ایک لیکچر دیا جس میں بہت سے پاکستانیوں نے بھی شرکت کی۔

اپنے لیکچر میں جسٹس افتخار چوہدری نے کہا کہ انہیں جو تکالیف پیش آئی ہیں وہ ان کا ذکر نہیں کرنا چاہتے۔  ان کا کہنا تھاکہ آزاد عدلیہ کے قیام کو یقینی بنانے کے لیے ہر ممکن کوشش کرنی چاہیے۔

جسٹس کے ترجمان اظہر من اللہ نے کہا کہ وکلا کی جدوجہد جاری رہے گی۔  ان کا کہناتھا کہ اگر عدلیہ کی بحالی میں کوتاہی ہوئی تو پاکستان میں آئندہ سوبرس تک عدلیہ آزاد نہیں ہوسکے گی۔

ایک طالبہ جونا ڈیوس نے کہا کہ آزاد عدلیہ کی تحریک  چلانے والوں کو اپنی جدوجہد جاری رکھنی چاہیے اور یہ آزادی کی صبح جلد طلوع ہوگی۔  جونا اس سال کے وسط میں پاکستان میں تھیں اور انہوں نے عاصمہ جہانگیر کی تنظیم کے ساتھ مل کر کام کیا تھا اور لانگ مارچ میں بھی شریک ہوئی تھیں۔  اپنی یادوں کو تازہ کرتے ہوئے انہوں نے کہا کہ وہ آزاد عدلیہ کے قیام کے لیے وکلا کی جدوجہد اور زندگی کے ہر شعبے سے تعلق رکھنے والے افراد کے تعاون اور جوش وجذے سے بہت متاثر ہوئیں۔