ابراہیم ڈے میں بانٹے جانے والے تحایف

ایک مقامی مسلم فلاحی تنظیم نے یہودیوں، عیسائیوں اور مسلمانوں کے مقدس دنوں کے احترام میں نیو یارک میں ابراہیم ڈے منعقد کیا جس کا مقصد مقامی ضرورت مندوں کی امداد بھی تھا۔

امریکہ میں جہاں کرسمس کی آمد کی وجہ سے جشن کا سا سماں ہے وہیں حال ہی میں مسلمانوں نے عید الاضحٰی اور یہودیوں نے ہانیکا کا جشن منایا ہے۔

ان تین ابراہیمی مذاہب کے مقدس دنوں کے احترام اور مقامی آبادی کی امداد کے لیے مقامی فلاحی تنظیم اکنا ریلیف نے ابراہیم ڈے منانے کا فیصلہ کیا۔

نیو یارک میں یہ دن کوئینز کے بے گھر افراد میں سردیوں سے بچنے کے لیے ٹوپیاں، دستانے، کپڑے اور بچوں کے کھلونے وغیرہ تقسیم کر کے منایا گیا۔

ڈائریکٹر میڈیا اینڈ پبلک ریلیشنز، اسلامک سرکل آف نارتھ امریکہ معاوظ صدیقی کا کہنا ہے کہ اس کام میں مقامی سکولوں اور کالجوں کے طالب علموں نے اکنا ریلیف کا ساتھ دیا۔

اسلامک سینٹر، نیو یارک یونیورسٹی کی صوبیہ حملانی نے بتایا کہ اکنا ریلیف، امریکہ کی ایک بڑی اسلامی تنظیم اسلامک سرکل آف نارتھ امریکا کی فلاحی شاخ ہے۔ عام طور پر امریکہ میں موجود مسلم فلاحی تنظیمیں دنیا کے کسی دوسرے حصے میں موجود لوگوں کے لیے امداد جمع کرتی ہیں لیکن اکنا ریلیف کے ذریعے امریکہ کے ضرورت مندوں کی مدد کی جاتی ہے۔ اور گزشتہ چند برسوں میں اکنا ریلیف نے امریکہ میں آنے والی قدرتی آفات کے بعد امدادی کاموں میں بھی بڑھ چڑھ کر حصہ لیا ہے۔

مثال کے طور پر سمندری طوفانوں قطرینہ، آئیک اور گستاو کے بعد اکنا ریلیف نے اب تک ایک لاکھ متاثرین کو کھانا کھلایا ہے اور متاثرین کی امداد کے لیے ابھی تک ان کے تقسیم کے مراکز موجود ہیں۔ اس طرح اس تنظیم نے امریکی فلاحی تنظیموں میں اپنی جگہ بنا لی ہے۔

معاوظ صدیقی کا کہنا تھا کہ اس تنظیم کے ذریعے جہاں مقامی ضرورت مندوں کی امداد ہورہی ہے، وہیں امریکی معاشرے میں مسلمانوں کو اپنی جگہ بنانے میں بھی مدد مل رہی ہے۔