سری لنکا کے وزیرِ کھیل نے باضابطہ طور پر سری لنکا کے دورہِ پاکستان کی تصدیق کردی ہے جِس کے تحت سری لنکا کی کرکٹ ٹیم پاکستان میں دو ٹیسٹ اور تین ایک روزہ میچ کھیلے گی۔

پاکستان اسپورٹس بورڈ کے ترجمان آصف سہیل نے بتایا کہ سری لنکا کی کرکٹ ٹیم دو مرحلوں میں پاکستان کے دورے پر آئے گی۔

ترجمان کے مطابق، سری لنکا کی کرکٹ ٹیم 18جنوری کو کراچی پہنچے گی، 21جنوری کو پہلا ون ڈے کراچی میں کھیلے گی، 24جنوری کو دوسرا ون ڈے لاہور میں کھیلے گی، جب کہ 27جنوری کو تیسرا ون ڈے فیصل آباد میں کھیلا جائے گا ، جس کے بعد 28تاریخ کو سری لنکا کی ٹیم کولمبو واپس چلی جائے گی۔

دوسرے مرحلے میں سری لنکا کی ٹیم 14فروری کو پاکستان پہنچے گی، اور دو ٹیسٹ میچ کھیلے گی۔ اِس حوالے سے میدانوں اور تاریخوں کا بعد میں اعلان ہوگا۔

آصف سہیل نے بتایا کہ سری لنکا کے وزیرِ کھیل نے پی سی بی کے چیرمین اعجاز بٹ سے ٹیلی فون پر بات چیت کی جِس میں اُنھوں نے دورے کی تصدیق کی۔ خاص بات یہ ہے کہ چیرمین پی سی بی نے سری لنکا کے اسپورٹس کے وزیر کو مدعو کیا ہے کہ وہ ادارے کے مہمان کے طور پر پاکستان آئیں۔

دریں اثنا سابق ٹیسٹ کرکٹر جلال الدین نے کہا ہے کہ مسلسل کرکٹ کھیلنے کی وجہ سے سری لنکا کو پاکستان کے خلاف نفسیاتی برتری حاصل ہوگی، جب کہ پورا سال ٹیسٹ نہ کھیلنے کی وجہ سے پاکستانی کھلاڑیوں کو زیادہ محنت کرنا ہوگی۔

جلال الدین نے مزید کہا کہ شعیب ملک اِن دِنوں اچھی کپتانی کا مظاہرہ کر رہے ہیں۔ یاد رہےکہ شعیب ملک کوحال ہی میں غیر معینہ مدت کے لیے پاکستان کرکٹ ٹیم کا کپتان مقرر کیا گیا ہے۔