نوجوان نسل سب سے پہلے جدید ٹیکنالوجی کا استعمال شروع کرتی ہے۔  مثلًا انٹرنیٹ اور سیل فونز کو ہی لیجئے، جہاں جہاں میسر ہیں، نوجوان ان کے دیوانے ہیں۔  ای میلز اور ٹیکسٹ مسیجز نے خطوں اور لینڈ لائن فون کی جگہ لے لی ہے۔  اسی لیے کئی تنظیموں نے نوجوانوں کو ایڈز کے بارے میں معلومات دینے کے لیے جدید ترین ٹیکنالوجیز کا سہارا لینا شروع کیا ہے۔ 

ٹیکنگ اٹ گلوبل نامی ایک آن لائن کمیونٹی کے دنیا بھر میں ایک لاکھ ستر ہزار ممبر ہیں۔  اور نوجوانوں کو اس کے ذریعے نہ صرف معلومات فراہم کی جاتی ہیں بلکہ انہیں ایسے مواقع فراہم کیے جاتے ہیں کہ وہ اپنی مقامی یا عالمی برادری میں پراجیکٹس کا حصہ بنیں، یا خود پراجیکٹس ڈیزائن کریں اور اس طرح مثبت تبدیلی کا باعث بنیں۔

ٹیکنگ اٹ گلوبل کی ٹیکنالوجی دنیا بھر میں نوجوانوں اور ان کی غیر سرکاری تنظیموں کے لیے مفت دستیاب ہے۔  جسے استعمال کرکے وہ اپنی ویب سائٹس بہتر بنا سکتے ہیں۔
 
اسی طرح آئی ایڈز ڈاٹ آرگ ایک ایسی ویب سائٹ ہے جو یونیسف اور ٹیکنگ اٹ گلوبل کے ساتھ مل کر کام کر رہی ہے۔  اس سائیٹ کے منتظمین کا کہنا ہے کہ اگرچہ پہلے سے بہت سی ویب سائیٹس نوجوانوں کو معلومات فراہم کرنے کے لیے موجود تھیں لیکن ان میں سے اکثر بڑی عمر کے لوگ، چلا رہے تھے، چنانچہ ان کی زبان اور ان کی ٹیکنالوجی وہ نہیں تھی جو نوجوان استعمال کرتے ہیں۔  اسی لیے اس سائٹ کو نوجوانوں نے ڈیزائن کیا ہے اور نوجوان ہی چلاتے ہیں۔ 

آئی ایڈز چلانے والی تنظیم گلوبل یوتھ کو الیشن آن ایچ آئی وی ایڈز کے بانیوں میں سے ایک اور تنظیم کی پروگرام ڈائریکٹر جویا بینرجی کہتی ہیں کہ اس ویب سائٹ سے انہیں بھی فائدہ ہوتا ہے جنہیں انٹرنیٹ میسر نہیں۔  کیونکہ ان کے ’ای کورس سے گریجویٹ کرنے والے نوجوان اسی ٹریننگ کو مقامی سطح پر سکھاتے ہیں۔  اور یہ ٹریننگ کسی بھی طرح کی ہو سکتی ہے، مثلًا پراجیکٹ منیجمنٹ کی ٹریننگ، ایڈز کے عالمی دن کے لیے کوئی تقریب، یا ایچ آئی وی ایڈز پر کام کرنے والے دوسرے نوجوانوں کو آپس میں ملانے کی کوشش۔ ”      

اس قسم کی ویب سائٹس اور نوجوانوں کی تنظیمیں صرف انگلش ہی میں نہیں بلکہ کئی مختلف زبانوں میں کام کر رہی ہیں۔  اور انٹرنیٹ کے ذریعے نوجوانوں کو اپنی اپنی کمیونٹی میں ایکٹیوسٹ بننے اور اس پیغام کو پھیلانے میں مدد دے رہی ہیں۔ 

ان ویب سائٹس کا ایک بڑا فائدہ یہ ہے کہ نوجوان، ایک گروپ کا حصہ بن جاتے ہیں اور ان میں ایک دوسرے کے ساتھ دوستی کے احساسات پیدا ہوتے ہیں۔  

ایسے علاقوں کے لیے جہاں نوجوانوں کو انٹرنیٹ تک رسائی کم ہو لیکن  سیل فون عام ہوں، جنوبی افریقہ کی ایک تنظیم نے ایک بہت ہی انوکھی ترکیب نکالی ہے۔  وہاں زیادہ تر لوگ اپنے سیل فون کے ذریعے انٹرنیٹ استعمال کرتے ہیں۔   اس لیے لو لائف نامی تنظیم نے ایچ آئی وی ایڈز کے مریضوں کے لیے دنیا کا پہلا سیل فون بیسڈ نیٹ ورک بنایا ہے۔  جس کے ذریعے لوگ ایک کمیونٹی کا حصہ بن سکتے ہیں۔

ان تنظیموں کا نقطہ نظر یہ ہے کہ سیل فون، کمپیوٹر، اور انٹرنیٹ آج کی زندگی کا حصہ ہی نہیں، بلکہ یہی مستقبل ہے۔  نئی نسل کے لیے اخبار، پرانے فون، اور لکھنے کے لیے کاغذ اور قلم، بہت تیزی سے ماضی کا حصہ بنتے جا رہے ہیں۔  اس لیے ان تک پہنچنے کے لیے اگر جدید ٹیکنالوجی کو استعمال نہ کیا گیا تو پیغام کتنا ہی موثر کیوں نہ ہو، ان تک بات نہیں پہنچے گی۔